■ Loide Jason
WINDHOEK- Aakalimo yomomukunda Onelombo-C moshikandjohogololo shaEtayi moshipotolwa shaMusati oya hokolola kutya oya kumwa komatokolo gelelo lyopamuthigululwakalo sho lya tetagula odhalate yenkolo lyomukulupe Rachel Haipinge omunamimvo 95, noku tula mo uundingosho.
Gumwe gwomaatekulu yomukulupe ngoka a popiwa naye koshikundaneki shika mEtiyali lyoshiwike shika okwa koleke onkundana ndjika ta ti kutya omalenga noshowo mwene gwomukunda gwawo oya teta ondhalate yenkolo lyawo opo pu wape okupita mboka taya yi muundingosho mboka woo wu li meni lyenkolo lyawo,
Aatekulu yomukulupe ngoka oya hokolola kutya yo oya ninga oonkambadhala ngaashi taya vulu okukala ya pula omalelo ngoka ge ya pe omatompelo kutya shoka osha ningilwa shike ihe ngashingeyi kapu na ngoka a hala okugandja omatompelo ngoka.
“Otwa pula kutya natu shangelwe ombapila ndjoka tayi hokolola omatompelo ngoka taga ulike kutya omolwashike ehala ndyoka ondhalate ndjoka ya li po ya tetwa po noopaala dha dhikulwa po . Ashike ombapila ndjoka oyo ngaa itayi ya nande tu yi pule,” osho gumwe gwomaatekulu ngoka a etela yinakulu olukeno a hokolola.
Okwa tsikileko kutya yo oya pewa uuthemba kuyinakulu ngoka a kulupa opo ya pule kutya omolwashike epya lye ngashingeyi tali kundulukwa komalenga ngoka taga ulike ga fa ga hala okukutha yinakulu epya lye oshoka okwa kulupa. Mwene gwomukunda Joseph Amutenya okwa hokolola kutya epya ndyoka inali gumwa ashike shoka sha gumwa ondhalate ndjoka ya tulwa po kaatekulu yaHaipinge mboka ya pata ondjila ndjoka hayi endwa kaakwashigwana.
“Omukulupe mwene gwehala ke na uupyakadhi washa onkene uupyakdhi owa etwa kaatekulu ye mboka ya pata ondjila ndjoka ya kala po nale oomvula odhindji dha pita po. Ngame pamwe naaleli yopamuthigululwakalo otwa tokola opo tu patulule ondjila ndjoka ya patwa,” osho a ikanyuna ngaaka.
Okwa tsikile ko ti ikanyuna kutya uundingosho mboka ta lundilwa kutya owo a panunina ondjila noku wu tula mepya lyomukulupe haye e wu tula po na owa kala po nale omanga aatekulu yomukulupe inaya valwa.
Ashike okwa ti kutya okwa tindi okushanga ombapila ndjoka ta pulwa kaakwanezimo mboka oshoka aatekulu yomukulupe mboka oye mu ula kutya ye ke shi kulesha.
Ndhoka gumwe gwomaatekulu okwe dhi ipatana nokwa ti kutya ngele Amutenya okwa tukwa ngaashi ta ti oshike ina tula mo oshipotha shopamuthigululwakalo a futwe oshoka omatukano ohaga futithwa.
“Omatukano agehe oge na ondando, ye Amutenya omukwaveta omolwashike ina tula mo oshipotha tu fute sho twe mu tuka ngele ota uhala ta futitha aantu momikunda mboka ya tuka yakwawo,” osho gumwe a pula Kundana ngaaka.
Amutenya okwa ti okwa kala uule womimvo 28 e li melelo lyopamuthigululwakalo noku shi oongamba dhomapya agehe ngoka ge li moka.
Mwene gwoshikandjo shoka shopamuthigululwakalo Moses Salomo naye okwa koleke ndhoka dha popiwa kuAmutenya kutya uundingosho mboka omo wa kala nale mepya ndyoka na aniwa elalakano lyawo lyokuteta po odhalate ndjoka okupatulula ashike ondjila opo aakwashigwana ya kale haya ende ngaashi naanaa ya kala haya ende nale.
Kundana sho a ningi omapulaapulo kumwene gweziko ndyoka Samuel Mateus okwa ti kutya aaleli yopamuthigululwakalo ayehe mboka ye li kohi yepangelo lye okwe ya lombwela nale kutya hamuntu a tindilwa ombapila ngele otaye pula kutya okwa puka nenge oku li mondjila.
Okwa hokolola woo kutya oshiningwanima shoka okwe shi tseya ashike ye okwa lombwelwa kutya aniwa ondhalate ndjoka ya hanagulwa po oya pata ondjila. Omanga aniwa shi na sha nuundingosho ye ita ti ko sha oshindji oshoka aniwa uundingosho owa li po nale ee tawu si po ngashingeyi owa galuka ashike.