LUHONONO – Baituti mwasilalanda sa Kabbe ili sesi tibiswa kimezi amuunda, baba nyandile nako yetelele kuzamaya misipili yemitelele kuya kwasikolo, kapa kulobala mwalibuma zakuikahela, cwanuñu baka imululwa muyaho wamaino omunca osweli kuyahiwa ha ukafela. August 26 neketilwe kuyaha muyaho wamasheleñi alikana bolule ba N$92, kasamulaho kampani yapili ifulalela purojekiti mwakweli ya Muyana 2016, imano lifiwa masheleñi alikana bolule ba N$13. Purojekiti neswanela kufela mwa Ñulule 2019.

Mwangambolo ni New Era Labubeli, muyemeli wakampani ya August 26, Cecilila Shitumbuleni naize muyaho wamaino fasikolo ukaba ni mindanwe yemine yamiyaho yekanga baituti ba 360. Muyemeli wasilalanda sa Kabbe ya Mutulo Bernard Sisamu, naize kuyahiwa kwamuyaho wamaino kutaha kanako yelukela. “Purojekiti nefilwe kwakampani ya Uzizi, nefulalezi purojekiti lilimo zeñata. Mubuso soketa kutambeka purojekiti yakuyaha maino abaitutu kwakampani ya August 26,” nekubulezi Sisamu.

Kanako yakutambeka sibaka sakuyahela ñohola, likwambuyu watuto Anna Nghipondoka naize bakeñisa kutokwa tumelelano ni kampani yene iyaha, purojekiti nelyehile ili kukungulela kwatuko tokwahalo yabana banaha Namibia. “Nihaike kitaba yetomohisa pilu, kihande kutalusa kuli mwalilimo zefelile mayemo apurojekiti ananuhile kabolule ba N$25. Kikusinya masheleñi amuuso, ase abonahala kale buinyani,” nabulezi kabunyemi kulwanisa makampani aputelela muuuso. 

Muyaho haukafela ukaba ni malobalo abasizana, malobalo abashimani, liapehelo, licelo, mizuzu yemibeli yakutapiseza, ndu yafolomani ni muyaho wakubuluka lisebeliso. Nduna wamunzi mwasilalo sa Luhonono Thadius Matengu nafitisize buitumelo kwabuso. “Baituti baluna bakaba mwasilelezo. Banyandile hahulu. Nihaike linja nizona neli canga lico zabona habaya kwamakilasi. Luitumela kwamuuso kwapurojekiti yeka konisa banabaluna kuituta hande,” nabulezi. Purojekiti nekalile mwakweli ya Muimunene ñohola.

Shitumbuleni naize purojekiti iswanela kunga lilimo zepeli mi baitamile kufeza mwakweli ya Muimunene isaho. Nihaike silalanda sitibiswa kimezi amuunda naize baitamile kufeza. “Kimezi feela amuunda, kono lubata kubona kuli luyaha kapili kuli mezi asike alukwalela. Mezi kwatasi kiamañata ili kalulo yelubela butata haluyepa misima kubeya matanka mwamubu. Kacwalo lubata kusebeza katata sihulu haku omile,” nabulezi. Kukenyizwe babeleki ba 104, kungelela cwalo ni babazwa mwasilalanda.