Mayemo alihalimu akutezi hahulu fafasi ane ali mwahala -3˚C ni 2˚C, ane asindeketilwe kimoya omutuna, viki yefelile nasiile bayahi banaha Namibia bakuña, mi babasina maino neba taselizwe hahulu. Katengo kasikiliti sa Khomas neka neuzi lituso za likubo zemashumi amane ni lingumbuli zama 20litazi zemashumi amane, kutusa batu babatibelezi kwalibapalelo la Khomas.

Kanako yakutambeka neulo muyemeli wasilalanda sa Khomas Samuel Angolo naize baka neulelwa lico, kono nasika bulela kuli lili. Naize neulo yene ifilwe neli makalelo mi bakabona kuli batusa cwañi. Naize ofesi yahae nefumani lico zekafiwa kubabashebile sihulu babapila kwalibapalelo, bane bamukupile kuli bafiwe mubu wakuyahela. 

“Katengo kasikiliti hakana mubu, lusweli kukandekisana ni katengo ka tolopo ya Windoko, kuli lukona kuisa kai batu ba,” nabulezi.

Yomuñwi wabayemeli wabatu babatibelezi kwalibapalelo Mario Gowaseb walilimo ze 21, nafitisize buitumelo kwaneulo, mi naize likubo lika batusa kwasilami. 

“Senibile kwanu kuzwelela Covid-19 haizuha. Maliha hataha kibutata kuluna bakeñisa kuli kwabata. Niitumela kumuyemeli waluna kakulufa likubo,” nabulezi. Babañwi nibona nebaitumezi, kono babañwi nebaize habatokwi likubo kono batokwa maino. Kwalibapalelo la Khomas kutibelezi batu ba mwanda. Maino ane ali aswalelele kanako yakuzuha kwabutuku bwa Covid-19, safetuhile maino akuinelela kwabatu babañwi.