OSHAKATI - Oshiwike shika osha li sha tameke noondando tadhi kuluka moositola, omolwesiku ndyoka hali kala ko omumvo kehe kehulilo lyaNovomba, tali ithanwa Black Friday.
Oshigwana osha kala nokutondekela moositola okutala iipindi, nonando esiku ndyoka lya kala lya tegelelwa Etitano lyonena.
Oshifokundaneki shika sho kwa li sha talele po oositola dhimwepo mOshakati, omikweyo odha tameke okuninga omile okuza Etitatu, nayamwe taya undulathana taya kondjele iinima mbyoka ya tulwa kondando yopevi lela.
Maria Shoopala ngoka a li ta landa iinima ye mositola Shoprite mOshakati okwa ti, omasiku ngaka hago goku ethwa nando, oshoka oyindji oondando odha kuluka. “Shito ohandi longitha N$2000 kehe momwedhi okugwanitha po oompumbwe dhandje dhomegumbo, ihe sho nda yalula nena otandi longitha ashike N$1 400. N$600 otandi pungula,” ta popi ngaaka.
Silas Kandjengo okwa ti okwa landa ashike shoka a li a hala, nonando oyindji oya kululwa, ite yi landa oshoka oku yi na nale.
“Onda li nda hala ashike othewa yokukoha, ihe oyo ashike tandi landa. Ondi na natango okugwanitha po oompumbwe dhilwe, onkene itandi mana po oshimaliwa shandje,” ta popi ngaaka.
Saima Shikesho okwa ti, okwa kala nokupungulila o “Black Friday, onkene ota ka longitha oshimaliwa she ngaashi e shi longekidhila.
“Oositola odha kutha ko lela, iinima oyindji oya kuluka noonkondo,” ta imemeha.
Ruben Johannes okwa ti, natango ku uvite kutya oBlack Friday oshike, oshoka iha mono pe na eyooloka enene.
“Oositola dhimwe otadhi pitile mo ashike, oshoka ohadhi kutha ko ashike oopelesenda ooshona, shoka okulila aantu. Koshinima ngele okwa za ongele kwa za oopelesenda dha thika 50%,” ta popi ngaaka.
Ta ti, aantu naya kale ya kotokela oondando, oshoka hoka okukutha oshimaliwa moondjato dhaantu, inaashi longekindhwa.
Johannes okwa ti, oyendji ohaya iyadha taya landa iinima inayi pumbiwa, oshoka anuwa ondando oya kuluka.
“Otwa taalela okili, moka tu na okukala twa hangana naakwanezimo, tu nyanyukwe pamwe, ihe otatu ki iyadha twaa na iimaliwa oshoka oya longithwa po moBlack Friday,” ta popi ngaaka.
vkaapanda@nepc.com.na