Omupresident gwaNamibia Nangolo Mbumba, okwa thiki Etiyali koBotswana omolwa oshituthi hupulitho shomupresidente omutitatu gwaNamibia Hage Geingob.

Goingob okwa hulitha mesiku 4 Febuluali nuumvo, mepipi lyomimvo 82.

Ombelewa yomupresident oyali ya shanga komalungula kepandja lyayo lyoFacebook kutya, Mbumba ota kala a thika nena moBotswana.

Oshituthi hupulitho shomupresidente Geingob, shoka tashi longekindhwa kepangelo lyaBotswana otashi ningilwa koGaborone, notashi tameke po8h00, nena.

“Iilyo yokambinete, aanambelewa aanene yomapangelo okuza miilongo ayihe iyali, Namibia naBotswana otaya ndhimbulukilwa pamwe, Geingob,” ya shanga ngaaka. 

Peha lyepangelo lyaNamibia oshowo aanamibia ayehe, omunyekandhi kwali Monica Geingos oshowo aanona oshowo omunyekandhi goshilongo Sestjie Mbumba, omupresidente Nangolo Mbumba okwa popi kutya okwa pandula omupresident Mokgweetsi Masisi omolwa uukwawo wanankani uulike pethimbo Namibia a li a sikilwa koshikogo oshiluudhe.

“President Masisi oye a li omupresident gwotango okuthika moNamibia konima kwa tseyithwa eso lyomupresident kwali Geingob, nonena okwa longekindha, esiku lyendhimbuluko lye,’’ ya shanga ngaaka.

Ya ti, shoka otashi holola uukume uuwanawa oshowo elongelo kumwe pokati kiilongo mbika iyali. 

Natango oya shanga kutya, omupresident Masisi, okwa popi kutya okuna omukumo neyineko lya kola kutya ilongo mbika iyali otayi tsikile nelongelo kumwe ewaanawa ngaashi ndyoka lya kala po.

“Ota tu tsikile oku kaleka po omatokolo twa li twat ula po, ngaashi okuendathana twa manguluka, iilonga yookongamba oshowo elongitho lyoonzo dhopaushitwe,” ya shanga ngaaka. – vkaapanda@nepc.com.na