LUHONONO – Busholi bwa likomu buzwelapili mwasikiliti sa Zambezi, mi cwanuñu muyemeli wasilalanda sa Kabbe ya Mutulo Bernard sisamu nauzwelizwe litole zelishumi kazepeli. “Busholi bupahami kwanu, halubulela balisana baka bamwatolongolo kuzwa kweli ya Yowa, kasamulaho akulekisa likomu zaka zalitole ze 12. Neni fumani zesilezi, zene ilo lekiswa mwanaha Zambia. Nebaitumelezi kulekisa likomu kateko yeinyani yelikana N$500. Komu ilimwi hailekiswa ikona kulekiswa N$6000,” nabulezi.

Naize batu kaufela mwasilalanda kukala kwa Kalimbeza mane ni mwasilalanda sa Kabbe ya Mbowela bauzwezwa likomu zabona. “Bakwalula milaka busihu ni kuuzwa likomu. Banga tutolenyana nikulonga mwamikolo ni kusila nuka ya Zambezi. Nako yemubalatelela ikaba kulyeha,” nabulezi. Butata bobuñwi naize kikutokwa babeleki kuzwelela mwanaha Namibia, baba satabeli kulisa likomu hakubapanywa nibayahi banaha Zambia. 

“Kutata kufumana balisani mwasikiliti sa Zambezi. Baba zwelela mwasikiliti sa Kavango bafumaneha kono habaini nako yetelele. Banaha Zambia bakona kuina nako yetelele, kono bauzwa likomu zaluna,” nabulezi. Nduna wamunzi wasilalo sa Luhonono Thedius Matengu naize kibutata bobubilaeza sicaba. “Buñata bwa masholi kibayahi banaha Zambia, sihulu balisana balikomu,” nabulezi. Sibuabui wasipokola Kisco Sitali naize kaswalisano ni mapokola banaha Zambia balikanga kukutisa likomu. Kono hañata zeñwi halikuti.

“Fokuñwi banga likomu kakapelezo kwabalisana baluna, nikukena mushitu. Zeo liezahala busihu ni musihali. Balimi baswanela kuzwelapili kudinta likomu zabona, nikubona kuli bakenya balisana babana ni mapampili,” neku elelize Sitali. Naize mapokola basweli kukandekisana ni baeteleli basizo mwasikiliti, kubona kuli tekiso yanama mwaminzi yazamaiswa.