Ongeleka yoCvmoan oya yambidida ovanhu ve li momhumbwe yomalukalo eshi ya tungila ovanhu omaumbo atano momukunda Iindjinda moshikandjohoololo shUukwiyu.
Omaumbo okwa yandjwa pambelewa komufita Sem Abiatar wongeleka Cvmoan mOlomakaya.
Abiatar okwa ti ongeleka yavo oya kala ya didilika oshiwana tashi mono oixuna eshi shi li momhumbwe yomaumbo naashi osha eta opo ongeleka yavo i kale ya konga oshimaliwa shokukala sha yambidida ovanhu va pumbwa omaumbo.
Okwa ti natango ongelaka yavo oyeli pyakidila nokutungila ovakalimo omaumbo vomoshitukulwa shaShana.
Efiku tuu olo ongeleka yoCvmoan oya yandja okulya noidjalomwa kovanhu vopomudingonoko Uukwiyu.
Abiatar okwa ti ongeleka yavo otai lalakanene okushakeneka epangelo ondjilakati tashi pitile mokutungila ovanhu omaumbo. Okwa ti osha fimana ngeenge oshiwana shina eenduda dokunangala dili monghalo iwa unene tuu pefimo lodula.
“Ovanhu va pewa omaumbo ova kala hava nangala meenduda hadi lokwa ngeenge kuna odula omanga vamwe okwali hava nangala meetenda,” Abiatar ta ti.
Okwa ti oshiwana nashi kwatafane nongeleka yavo ngeenge shili momhumbwe yoikulya ile oidjalomwa opo ongeleka i kale ya ninga omalongekido.
Okwa kunghulila eengeleka opo di kale tadi yambidida ovanhu veli moluhepo shaashi eshi otashi kwafele okulwifa ondjala noluhepo.