Minista gwomauyelele Peya Mushelenga okwa ti nonando okudhimbulukwa eso lyomupresidente okwa pitikwa, shika inashi ningwa momangundumano omanene inaaga pitikwa.

“Omandiki oshowo omahangano ga yooloka inaga indikwa okuninga omadhimbuluko gomupresidente, ihe ngoka ge na omwaalu gwa pitilila otaga ningwa ashike uuna ya pewa omapitikilo okuza kokomitiye tayi ungaunga noshituthi shika,’’ ta fatulula ngaka.

Mushelenga okwa li ta popi ngaaka sho a li ta gandja uuyelele kombinga yomalongekindho gefumbiko lyomupresidente Geingob.

Ta ti, ota kala ta tseyithile oshigwana kombinga yomadhimbuluko taga kala taga ningwa sigo esiku omupresidente ta fumbikwa.

“Omadhimbuluko ngoka otaga kala taga ulikwa koFacebook  kuuministeli wuuyelele,” ta popi ngaaka.

Minista okwa popi kutya omadhimbuluko ngoka ga kala nokuningwa momukokomoko goshiwike, otaga ka mwena po mehuliloshiwike okugandja ompito kaakwanezimo ya fudhe po.

Mushelenga natango okwa kumagidha oshigwana shi tseyithile opolisi ngele sha mono mboka taya longitha omukalo gomonyowa okugongela oshimaliwa shelongekidho lyomupresidente.

“Otwa ndhindhilike omapandja ga totwa gokomalungula, ga nuninwa oshuumbila shelongekidho lyomupresidente Geingob. Otwa hala okuyelitha kutya epangelo inali pitika nando ogumwe ta gongele iimaliwa yefumviko,” ta popi ngaaka.

Ta kumagindha kutya mboka taya ningi iinima yi li ngaaka naya lopotwe kopolisi.

Mushelenga natango okwa kunkilile oshigwana shi hulithe po okudhana neso lyomupresidente ihe nashi simanekwe nokudhimbulukiwa momukalo omwaanawa.

“Mboka taya longitha omikalo dha yooloka okupopila omuleli gwoshilongo kwa li muuwinayi, otaya ningi nayi, ihe shoka itashi pitikwa nando,’’ ta kumagindha ngaaka.

Uuministeli, omandiki nomahangano ga yooloka oga kala nokutuma omatumwalaka gomahekeleko okupitila miikundaneki ya yooloka.

Oyendji oya dhimbulukwa omupresidente ongomuleli omwaanawa, omugandji nomunambili.

Oya gandja wo omahekeleko komuselekadhi Monika Geingo, aanona naakwanezimo.

-vkaapanda@nepc.com.na