Eekoondoma hadi yandjwa oshali koipangeo yapangelo moNamibia da shiivika nedima “smile” oda monika vati tadi landifwa momapandavanda aAngola.
Otaku hokololwa Ovaangola hava havala eekoondoma oshali moipangelo moNamibia noshoyo oupangelona ve li koshi yepangelo laNamibia ve li moAngola noha ve ke di landifa. Vali, otaku ulikwa yoo omunwe ovanambelewa vomouministeli wouhaku nonghalonawa, kutya ope na vamwe tava pitifa eekoondoma va ka landifilwe poshishiindalongo.
Omukalo wongeshefa yoludi ei owa etifa oipangelo ihapu i kale ya kolota eekoondoma.
Ombangi imwe ya tumbulwa iha popiwe kedina oya yelifa kutya, moAngola omu na okapangelo konhumba ke li moSanta Clara oko ke li koshi yetonatelo lepangelo laNamibia oshoyo Red Cross. Okwa twikila kutya okapangelo oka nuninwa Ovaangola ava hava ende oinano ile tave ya okukonga omiti moNamibia opo va tetwe ondjilakati.
Ombangi oya yelifa yoo kutya okapangelo ohaka kala unene ke na omiti do TB, ARV, eecondoma, eenete deemwe oshoyo oumuti vokuwapaleka omeva.
Okwa twikila kutya inashi yela yoo nawa ngeenge eekoondoma edi hadi landifwa momalukanda aAngola oda dja pokapangelo aka ke li moSanta Clara ile oda dilila koipangelo ili meni laNamibia.
Omupangi umwe oo a pula yoo aha tumbulwe kedina okwa yelifa kutya okuhe na eekoondoma da wana moshiwana osha nyika oshiponga shakula ngeenge tashi ya koundjolowele wovakwashiwana.
“Omwaalu womikifi hadi pitile momilele inadi amenwa kadi na vali fiku di shune pedu shaashi oinima ya nuniwa okuamena omikifi doludi eli, otai shingifwa. Oinima ei otwa pumbwa oku i yandjafana naava ve na omangeshefelo omalodu opo ve tu kwafele mokupa oshiwana ndele paife ohave lihange ashike navo ihava mono sha vali,” omupangi ta tumbula.
Omupopiliko wominiteli youhaku noukalinawa Walters Kamaya okwa yelifa oministeli oi shi shi kutya ope na oshiningwanima sheekoondoma tadi landifwa moAngola.
“Inatu mona ashike olopota yofaafa ile omhunu a monika ndele ta lopotwa, ashike keshe ou taka hangika e na onyala moshiningwanima sholudi eli otu na okuungaunga naye,” Kamaya ta tumbula.