Omukulunhuwiliki wouhaku moshitukulwa shaShikoto okwa koleka kutya oshipangelo shaMuthiya osho kwa li sha ninga eemwedi nhano shi na eelamba itadi tema, paife osha tema. 

Joshua Nghipangelwa okwa ti onghalo yomilaulu moshipangelo oya kandulwa po, eshi ombelewa yaye yeshi pondola oku mbesitela eelamba odo vati hadi monika ashike koChina. 

Nghipangelwa okwa ti eelamba oda landwa kongushu yoshimaliwa shi dulife N$100 000 noda tulwa mo Etivali loshike eshi. 

Oivike ivali ya pita, oshifo kundaneki shoNew Era kwa li sha shanga kombinga yoshipangelo shaMuthiya osho sha li modima. 

Ovanailonga voundjolowel e koshipangelo omo ova kala va ti va lulilwa konghalo eshi hava longo moshipangelo mwa dima efimbo loufiku kwa li. 

Ova kala hava minikilifa noutoshe veengodi davo dopeke ngeenge tava ya kula ovanaudu oufiku omanga ovanaudu ohava kala meeshaala mwa dima. 

Ovanaudu vamwe va ti okwa ihave li vake mo moshipangelo efimbo loufiku omolwa odima. 

“Okwa li hatu longo noudjuu efimbo loufiku unene tuu ngeenge hatu ya kula oomeme ve ya okupulumuna ile ngeenge omunhu a mona oshiponga shaashi ihatu kala tu wete ko nawa,” omupangi ta kolola. 

Ovapangi ova lombwela Kundana tava ti paife otava ka longo noupu noshoyo okuyandja omayakulo eli xwa po kovanaudu, noku he na oupyakadi. fhamalwa@nepc.com.na