ONGWEDIVA - Elelodoolopa laNgwediva ola mana opoloyeka yokutunga omalambo onyata koExtension 15 oshoyo Sky Phase1 a kosha eemiliona N$15.2.

Omalambo aa otaa ka yakula omaumbo e li 620 momalukanda oo avali.

Ominista yomapendulepo eedoolopa noitukulwa yokoushai Erastus Uutoni okwa ti, efikamepo lomalambo onyata otali ulike elitulemo lepangelo moilonga ya pamba ovakwashiwana.

Uutoni okwa twikila ko yoo kutya eepoloyeka edi natango otadi ulike nghee ovaleli vodoolopa ve liĺtula mo mokuyandja omayakulo e na sha noukoshoki, oshoyo eemhumbwe dovanhu vomomikunda davo.

 Okwa kunghilila oonakupewa omayakulo va kale noku a fila oshisho, shaashi ngeenge okwa kala e li medundakano otaa ka eta omaupyakadi ngaashi ekakeko longhalo yomhepo, oshoyo omikifi da nyika oshiponga mokati kovanhu. 

Uutoni okwa twikila yoo kutya omeva mahapu onyata omomidingonoko daNgwediva ohaa kala taa kunguluka momukalo inau nyika oukoshoki. 

Ovaleli vodoolopa   ova tula omalandulafano peenhele opo va fye oshisho kutya eenhele edi nado oda wapalekwa. 

Mayola waNgwediva Taarah Shalyefu okwa ti, ovakwashiwana ava va pewa omalambo ape otava ka longifa omalambo aa oshali. 

“Extension 15 otai ka longifa oshali fiyo 30 Novemba 2023 omanga Sky Phase ta ka longifa fiyo omo 31 Desemba 2023,” Shalyefu ta tumbula. 

Elongifo loshali otali ka pula oshikefa shelelo lodoolopa eemiliona N$1.3.

“Elalakano lokuyandja omalambo a longifwe oshali omolowekonomi olo ladenga ovanhu vahapu unene oExtension 15 noSky Phase,” Shalyefu ta ti.