ONGWEDIVA - Ovanangeshefa vahapu, mwa kwatelwa vamwe tava di kondje yoshilongo otava ka kufa ombinga komaulikilo oipindi aHelao Nafidi.
Omaulikilo oipindi otaa ka Tameka Etitano loshivike tashi ya fiyo momafiku 4 Novomba.
Mopaife ngaha oshi li oshikando oshi-16 odoolopa yaHelao Nafidi tai ningi omaulikilo oipindi okomundo, noneudo okwa teelelwa eengeshefa 129, da kwatela mo hamano tadi di kondje yoshilongo.
Omupopiliko melelo lodoolopa yaHelao Nafidi Selma Kapembe okwa ti elalakano lomaulikilo oipindi okuyandja omhito koshiwana opo shi landife oilandifomwa yavo mwa kwatelwa ovanyasha.
Onghee okwa ti ei oyo omhito iwa koshiwana okukala she limonena oyuuyemo nokueta po eemhito doilonga pefimbo lokulandifa.
Okwa weda po ta ti omaulikilo oipindi okwa fimana molwaashi otaa yambula po odoolopa tashi pitile mokunana ovanangeshefa va ninge omangeshefelo modoolopa yaHelao Nafidi.
“Otwa shivifila nale ovanambelewa vopolifi opo va kaleke po eameno efimbo keshe mendiki lomangeshefelo. Onghee eameno oko li li nawa efimbo keshe,” Kapembe ta ti.
Kapembe okwa ti omalongekido ayeshe okwa pwa okuninga onghee oshiwana osha tambulwa ko okukala sha fika sho shi yambidide ovanangeshefa.
“Omahangano a yooloka ile ovanangeshefa vashona ve na ehalo lokukufa ombinga momaulikilo oipindi okwa manguluka okukwatafana nombelewa yetu molwashi natango out na onhele ya wana,” ta ti.