Opilifi oya lopotelwa ovanhu va kanifa eemwenyo davo moiningwanima ya yooloka.
Muimwe yomoiningwanima ya lopotelwa opolifi, efyo lomunamido 31 Simon Petrus oo a fya moshiponga shomundilo.
Otaku hokololwa Petrus oo a li e na oulema wopamadiladilo a pila nokuxulifila meumbo lopoushiinda.
Petrus vati okwa ya poushiinda noku ka nangala monduda yoshipeleki, oyo ya ninga efiku ihai nangalwa shaashi mwene wayo oku li koushimba.
Oshiningwanima eshi osha ningilwa momukunda Onamukulo moshitukulwa shaHangwena.
Opolifi oya hokolola kutya fiyo opapa oshietifi shomundilo kashi shiivike, nomudimba waPetrus vati owa twalwa kokila yEenhana opo u ka ningilwe omakonaakono.
Moshiningwanima sha yooloka, omukalimo umwe womuhoko wOvayelele vati okwa xulifa eshi a tuwa kumumwaina.
Haifi Loukas vati okwa xulifa Etitano la dja ko eshi a tuwa nombelwe yokapi monhulo, lwoikando ivali. Ovamwainafana ava vati ova tamekela olwoodi lavo meumbo omu hava di.
Omufekelwa okwa tulwa moipandeko nomakonaakono opolifi otaa pula komesho.
Moshiningwanima shikwao natango opolifi oya lopotelwa omulumenhu weedula 69 a xulifila pomhunghulofuta moSwakopmund.
Vorster Chritoffel Daniel Wilhelm, vati okwe liyasha noshifufuta shoukongo komutwe ndele ta xulifile poshiningwanima.
Wilhelm vati ina fiya po nande omukanda tau holola kutya elikufomwenyo laye ola etwa koshike. Opolifi oya ti ovapambele vaye ova shiivifilwa, nomakonakono otaa twikile.
Abraham Profiliu omukwashiwana waAngola okwa lopotwa a fila moshiponokela shovafekelwa veha shivike moWindhoek.
Profiliu vati okwa li ta ende nOvaangola vakwao moKatutura, eshi va ponokelwa kovalumenhu vavali tave va pula eengodi oshoyo oinima yavo vali va humbata.
Ovaangola eshi va mona va ponokelwa keshe umwe vati okwa faduka po a yuka ombinga yaye opo e lixupife. Profiliu vati okwa ka tuwa nombele monhulo ndele te lidenge pedu popepi nomulamba u li po.
Olutu laye vati ola ka monika ongula li li momulamba.
Nakufya okwa hokololwa kutya okwa li omushingifi womomandaanda aWindhoek.
Ovafekelwa vati kave shiivike, nopolifi otai pula moshiwana shiva kwafele mokukonga ovanhu ava. Omakonaakono opolifi otaa pula komesho.