ONGWEDIVA - Chief Ndilimani Iipumbu welelo laUkwambi okwa pula epangelo opo li tunge omatale mahapu noshoyo eemboola dihapu domeva konooli yoshilongo.
Iipumbu okwa ti oitukulwa yomonooli oya taalela eshongo linene lomeva sha etwa konghalo yokuhe na eemboola da wana nomatale.
Edi Iipumbu okwe di popya moshipopiwa shaye sha leshwa ponhele yaye kelenga loshikandjo Ediko laOweye, Ashuulu Simeon komutumba womeva wa li mOngwediva Etitatu.
Ouministeli wounamapya, omeva netulululo lomadu owe lipyakidila nokuninga omitumba moitukulwa ya yooloka opo oshiwana shi kundafane kombinga yonghalo yomeva.
Okwa ti omatale okwa pumbiwa momikunda shaashi otaa kwafele okutalama omeva pefimbo lodula.
“Ngeenge omatale okwa talama omeva otaa ka longifwa pefimbo lokwenye. Onghee omeva okwa fimana koimuna noshoyo kovanhu,” Iipumbu ta ti.
Okwa weda po ta ti oshiwana hashi ende oshinano shile tashi ka konga omeva molwaashi momikunda dimwe kamu na eemboola ile omatale.
Iipumbu okwa pandula ouministeli wounamapya eshi tau twikile nokulonga noudiinini okuyandjaneka omeva moshiwana.
Okwa weda po ta ti ouministeli wounamapya ou na oshisho noshiwana konima eshi va tungulula okanala.
“Okanala paife ota ka longo nawa, oshiwana osha hafifwa koilonga ya longwa kouministeli wounamapya shaashi paife otashi longifa omeva okudilila mokanala,” ta ti.
Moshipopiwa shaye minista wounamapya, omeva nedulululo lomadu, Calle Schlettwein okwa ti kumaida oshiwana opo shi twikile okulongifa nawa omeva.
“Omeva okwa fimana kovanhu noimuna. Eemboola domeva nadi kwatwe nawa opo di dule okulongifwa oule fimbo lile,” minista ta ti.
Onghee okwa ti ngeenge kape na omeva oshiwana otashi fi kenota.
Okwa ti ouministeli wavo otau twikile okuyandjaneka omeva koshiwana shaashi omeva okwa pumbiwa efimbo keshe.
Okwa ti ombelewa yaye oya didilika yoo vali ominino domeva hadi ende kashona monooli.
Onghee okwa ti ombelewa yaye otai ka longela kumwe nehangano lomeva loNamwater opo oupyakadi u kandulwe po.
“Omeva otaa hambula po oshikondo shounamapya tashi pitile mokulongifa moikunino,” ta ti.
Okwa weda po ta ti oshiwana nashi longele kumwe noovene vomikunda okukelela elongifo nai lomeva momikunda.
Lopokati opo, minista okwa ti ouministeli wavo owa lopotelwa eemboola 120 da da tewa po koshiwana.
“Ovanhu tava longele eemboola domeva ominyonena nava lopotwe opo va katukilwe onghatu yopaveta. Itashi ulike efano liwa ngeenge epangelo tali tungile oshiwana eemboola ashike otadi tewa po,” ta ti.
fhamalwa@nepc.com.na
Omeva... Elenga enene Ndilimani Iipumbu welelo laUkwambi
Efano: Festus Hamalwa