Elelo lyondoolopa lyaNdangwa olya indile okulongela kumwe nehangano lyo-MTC, nelalakano lyokuyambula po nokuhumitha komeho ondoolopa oshowo okuyambidhidhathana miimpungu ngaashi yomaudhano nuutekenika.

Omugandji gomauyelele mehangano lyo-MTC Erasmus Nekundi okwa ti, elelo lyondoolopa yaNdangwa okwa li lya talele po ehangano lyo-MTC, nokufatulula elalakano lyeyindilo lyuukumwe oshowo onakuyiwa yelelo lyondoolopa.

Omukuluntu gwelelo lyondoolopa lyaNdangwa Ismael Namugongo anuwa okwa popi kutya, ondoolopa yaNdangwa otayi humu komeho.

“Sho shoka elelo lyondoolopa lyetu tali ka pumbwa omayambidhidho okupitila muukumwe opo ondoolopa yi yambukepo nokuhuma komeho oshowo okuningila aakalimo yawo omauwanawa ga yooloka,” ta ti ngaaka. Omukuluntu gwehangano lyo-MTC Ricky Erastus ngoka anuwa a li a taamba ko enenedhiladhilo neyindilo lyelelo lyondoolopa lyaNdangwa okwa totha mo kutya shoka otashi vulu okuningwa okupitila momilandu dha yooloka dhi li po. 

“Ehangano lyetu otali ka talela po ondoolopa yaNdangwa methimbo efupi, opo ku kundathanwe nkene ku na okuhumithwa komeho ondoolopa miimpungu ngaashi yuutekenika oshowo nkene MTC ta ka kwatathana noshigwana okugandja omalongo nkene ge na okulongitha omayakulo go-MTC,’’ Erastus ta ti ngaaka.

Erastus okwa li a pandula kwaashoka elelo lyondoolopa lyaNdangwa lya tokola, nokwa kwashilipaleke kutya elongelokumwe lyawo otali ka eta po elunduluko ewanawa neyambulepo oshowo ehumokomeho lyehangano MTC oshowo lyondoolopa yaNdangwa. 

vkaapanda@nepc.com.na