Aakalimo yomOvenduka otaya kunkililwa ya kale ye li uupathi sho ethimbo lyomapeya lya thikana. Shika osha landula konima ondalu yaNelyanga ya li ya tukuka momulamba gu li molukanda lwedhina Hochland Park mOlyomakaya. 

Omunambelewa omukuluntu gokombelewa yoshilando yi na sha nimindilo, Masule Mayanga, mOlyomakaya  moonkundathana noshikundaneki shoNampa okwa li a dhenge omuthindo kutya aakalimo moshilando na ya kale uupathi okwiigamena nokugamena omaliko gawo pethimbo ndika lyomililo hadhi tukuka pokati koomwedhi Juli naKotomba.

Okwa ti ombelewa yawo oya li ya dhengelwa ongodhi lwopotundi 14h23 mOlyomakaya taku lopotwa omulilo, noya li ya yamukula mbala oku ka gandja omayakulo gokudhima omulilo ngoka. 

Kakele komulunga gumwe ngoka gwa li megumbo lyimwe gwa pi po, inaku lopotwa omaliko galwe gopaumwene ga monithwa oshiponga

Mayanga okwa dhenge omuthindo nkene sha simana kaakalimo ya igamene, pamukalo gwokoopaleka nokulima po omwiidhi gwa dhingoloka omagumbo gawo sigo oometa ndatu lwaampoka opo ku shunithwe pevi ompito yomagumbo nomaliko gawo galwe kaaga kwatwe komulilo.

“Itatu vulu okutya ogwa etwa kushike lela, ashike otu uvite kutya osha etwa komuntu. Otwe shi pondola okugamena egumbo lyimwe moka omulunga gumwe gwa li gwa yaka omundilo. Omundilo ogwa li gwa fike konyala oometa 300 momulamba,” ta ti ngaaka.

Mayanga ta ti wo aakalimo yamwe ohaya ikukuthile omatokolo gokufika omilamba opo ya sithe oongangala uunye okuholama momangande moka, ta ti ombelewa yelelo lyoshilando yokukandeka iiponga ngambyoka ohayi kunkula omilamba nonando tayi nana nuudhigu molwompumbwe yiikwa niipangitho.  –Nampa