Minista gwomayambulepo goondoolopa niitopolwa yokuushamba Erastus Uutoni okwa endulula kutya osha simana opo aakwashigwana naaleli yawo yopamithigululwakalo ya longithe iitumbula yomondjila uuna taya holola aaleli yawo.
Sha ikwatelela kuminista, oshitya ‘King’ nenge ‘Queen’ osha puka okwiithanitha aaleli yopamuthigululwakalo pakotampango osho wo paveta sha ikwatelela kokatopolwa 11 kOmalelo gopamuthigululwakalo komvula 2000, (Act 25 of 2000).
Pamithigululwakalo moNamibia aantu ohaya longitha iitya mbyoka iyali, pa pingakanitho niitya hayi longithwa oku ithana aakwaniilwa.
“Shika otashi ti kutya uuna taku tumbulwa aaleli yopamuthigululwakalo, iitya ngaashi Hompa, Ombara, Ohamba, Omukwaniilwa, Goab, Nkosi, Fumu nayilwe, oyi li meni lyekotampango,” Ta ti ngaaka.
Uutoni okwa li a popi ndhika mOmaandaha pethimbo lyeegululo pambelewa lyomutumba omu-24 gwongongahangano yaaleli yopamuthigululwakalo ngoka gu li moSwakopmund, ta ti, ekotampango lyaNamibia inali pitika iitumbula ngaashi ‘King naQueen’.
Minista okwa li a gandja omayele opo iilyo yomalelo gopamuthigululwakalo yi kale tayi longitha omadhina ngoka ga uthwa momalaka gawo nonando taya popi melaka lyOshiingilisa opo ku kwashilipalekwe kutya aaleli otaya ithanwa mondjila.
Uutoni okwa dhenge omuthindo kutya epangelo otali tsikile okulonga pamwe nomalelo gopamuthigululwakalo opo lyi vule okutunga po oshilongo shika. Ngoloneya gwoshitopolwahogololo Erongo, Andre Neville Itope okwa popi nkene omalelo gopamuthigululwakalo haga dhana onkandangala moshilongo okukaleka po omithigululwakalo, okutula kumwe aantu, osho wo okukaleka po ekwatathano ewanawa pokati kepangelo naakwashigwana.
Itope okwa popi kutya olundji ohaya kandula po oonkalangongo, ohaya kutha ombinga meyambulepo lyaakwashigwana, omanga ontseyo nowino yawo yopandjokonona osho wo yopamuthigululwakalo odha simana mokulela nuupu.
“Omutumba nguka gwokomumvo ogwa simana kune ongaaleli yopamuthigululwakalo, opo mu taambathane omayele, nokukundathana omashongo ngoka ge li miikandjo yeni. Moonkundathana nelongelokumwe omo tatu mono nkene omaupyakadhi taga kandulwa po pamikalo omiwanawa osho wo okuyambula po iitopolwa yetweni,” ta gandja omayele ngaaka.
Omutumba nguka gwomasiku gatano ompito ombwaanawa komalelo gopamithigululwakalo, epangelo osho wo oshikondo shopaumwene yi kundathane iinima mbyoka tayi yi ehumokomeho moshipala. -Nampa