• November 21st, 2018
Login / Register

Endjala kapi hafa morwa epangero kapi lina kuranda muzangu gomosirongo

Languages
Languages

Nuusita Ashipala Outapi-Nguuru gomukunda Omusati, Erginus Endjala, kapi yina kumuhafesa eyi mavango gepangero gana kupira kusikisamo etokoro lyokabinete asi vahepa kuranda monzangu gomosirongo sawo. Age katente asi epiro kusikisamo etokoro eli, kuna kureta nye udigu kovanafaramagona vetu vana kuzangura momapya omu vana kupira kugwana marandesero. Ose kapi tuna kuyimona asi tayihoroka omu vana kuranda nomuzangu domonda zosirongo. Ose kwakara noveta zongwa, nye kapi tuna kuzitura moyirugana. Epuko musinke? Yimo ngoso ana kupura Endjala. Endjala kageve nonkangoedi pepongo lyomema, nondja omu naturugana tusikisemo kukwama omu una litjindji uzuni. Mo2014, kabinete gwageve asi nomberewa, nomisteli nonokampani dakara asi depangero rambangako oku ava gwana nondja vahepa kutara asi nondja edi danyamwetu ndi kuna kutunda kevango lyetu nyamwetu. Ntani simpe kwavapere asi vahepa kuranda kovanafarama vanyamwetu. Endjala katente asi age kuna hara kumona asi nondja danyamwetu kuna kudiruganesa momavango gepangero ngwendi nosure noyipangero ngoso ntani vakwayita novaporosi. Kapi nayitutukukisa nsene asi woyitora kapi vana kuranda kwetu, ose nye tuna kara asi epangero twahepa kukara marandesero gawo. Anon ye nsene asi etokoro eli kapi lina zi mosirugana, hawe kapi yina kara mulyo mokukorangeda vanandima asi vahepa kulima. “ Ose ngesi kuna kutantera vantu vetu asi valime ndi asi vazangure, nye kapi tuna kara negano asi kupi ngava karandesere yene oyo vana kuzangura. Makura awo yilye vana kulimina?” yimo ngoso Endjala apa kupura. Age simpe katente asi kapi yina kumoneka nawa morwa eyi vana kuzangura vantu vetu kapisi ureru kuyigwana pomavango twatura asi gokurandesera. Nokutanta asi Olushandja Horticultural kwazangwire notona dokusika ko 619, momvhura zeyereko yimaliva 2016/17 nye eyi vazangwire kwazire melikwamo nalyo peke. “Eyi kukoresa komutima, nsene kapisi mukaro gousatana,vantu vetu kuna kuzangura nye oyo vana kuzangura nokuyigwana si pomarandesero ganyamwetu. Simpe ngesi kuna kara nonotona dina kara asi kapi tuna divarura edi twarandesa pwahama asi pomaraka.” Yimo ana kutanta Endjala. Age pokuhulisa kahundilire epangero asi vahepa kugava etokoro asi momavango gepangero nagenye vahepa kukara nelikwamo lyokulya nondja domosirongo.
New Era Reporter
2018-03-15 09:36:10 8 months ago

Be the first to post a comment...