♣Eeloli domeva oda teka
♣Eemboola odi na omeva malula
♣Eefikola otadi teke momifima
Onghalo yokuhe yenota mOshikoto oya hanya, unene tuu omafiku aa, eshi eeloli depangelo odo da li hadi twala omeva keefikola da teka.
Eembola odo da tungwa kepangelo odi na omeva malulu itaa dulu okunuwa kovanhu.
Ovanafikola novahongifikola ohava ka teka omeva komifima molwaashi omeva okwa pwa po peefikola.
Omeva okwa pwa po peefikola molwaashi eeloli odo hadi twalwa eetenga domeva keefikola oda teka. Onghee naashi osha eta opo eefikola di kale dihe na omeva.
Omuhongifikola ha longo ofikola moshikandjohoololo Nehale lyaMpingana okwa hokolola ota ti kashipu okuhonga pofikola pehe na omeva molwaashi ohava pumbwa omeva okunwa.
“Paife ohatu piti eengula dinene hatu ka teka omeva momifima molwaashi ngeenge otwa ka teka kwa lata oto hange omeva a pwa ko,” ta hokolola.
Omuhongifikola umwe okwa ti omhumbwe yomeva keefikola otai eta ovahongifikola va ka longele keefikola dimwepo oku ku na omeva.
“Kape na omunhu a hala okuhonga mofikola muhe na omeva. Omeva okwa fimana efimbo keshe koilonga. Onghee otu li moupyakadi womeva kofikola yetu,” ta ti.
Eshi a kwatafana naKundana omupopiliko mouministeli wounamapya, omeva netulululo lomadu, Jona Musheko okwa ti ouministeli wavo owa didilika oupyakadi womhumbwe yomeva mOshikoto noshoyo koitukulwa imwepo monooli.
Musheko okwa ti ombelewa yavo oye lipyakidila nokupangela eeloli odo da teka hadi twala omeva keefikola. “Ohatu ka twala yoo vali eetenga domeva heyali keenhele oku kuna omhumbwe yomeva.
Onghee otwe lipyakidila okukandula po omukundu ou diva molwaashi omeva okwa fimana kovanhu,” ta ti. Neudo ominista wounamapya, omeva, edu nomakuti, Calle Schlettwein okwa ti ombelewa yaye oya longekida oshimaliwa sheeN$15 eemilliona dokulongifa okuyandjaneka omeva moitukulwa yomonooli. Minista edi okwa li edi popya pefimbo kwa li ta nyamukula eindilo lookanseleindilokandjohoololo nomalelo opamufyuululwakalo tava pula epangelo li kandule po omukundu womeva.
Schlettwein okwa ti ouministeli waye owa didilika omhumbwe yomeva tai dana onghandangala monooli omo ovakwashiwana hava ende eendjila diledile tava ka konga omeva momifima omanga ovanhu vamwe ohava teke meendungu mu na omeva alula.
Onghee okwa ti ouministeli waye otau lalakanene okuyandjeneka omeva moshiwana molwaashi omeva okwa fimana.
Lwopokati opo, kansela woshikandjohoololo shEengodi Protasius Neshuku ota hokolola ta ti oshiwana onghee nga tashi twikile nokudengwa kenota omanga ovanhu vamwe ohava ende oshinano shile tava ka konga omeva komifima.
Kansela okwa ti no nande epangelo la ninga eenghendabala dokutungila ovakwashiwana eembola domeva ina shi kwafela sha molwashi eembola odi na omeva malula.
Okwa didilikwa oikandjohoololo ngaashi Okankolo naNehale lya Mpingana moshitukulwa shaShikoto nayo ya taalela omhumbwe yomeva noshoyo onghalo yeendjila dii nomakwatafano aMTC.