Jazema Hangero 

Omunane woporise we ritonene oruhongwe na tja okuzamba mave utu okuyera ovikausina kokutja ve ungure oviungura vyavo ousopoke. 

Sandi Tjaronda, worutu orurwise rwourunga mEpukiro, OCASA, wa raisire kutja ozongombe ozonḓenḓu 20 ze yenena okuṱa motjivike, tji tja henununa orukwato orondu nḓa sokukwata onḓe ṱa. “Katu kwatisa ozondana paatu kwatisire, nai wina katu pitisa ozondana paatu pitisire noondarire okutwara kOsouth Afrika.” Ndji ri ongaro ndja eta kokutja Otjauana tji kapite Onamibia momarandisiro wozondana ozomburaurwa. Nu omena rokutja ve nozongombe nḓe kwata nambano inḓa oza Namibia nḓe ṱa pevapayuva kaze tji kwata pondondo pu za sokukwatera. 

“Ourunga mbwi u ṱuna kehupo romaṱunḓu, moruyaveze ouzeu mbwi mau kaṱuna kombwiko yehi otja mbu tu tjiukirwa konyama ombwa yomutjato omuwa nu omberuke,” Tjaronda wa tja nao. 

Mongondjero yokuhenununa nokutjevera ourunga wovinamuinyo, ovimbumba vya wana mEpako momautiro womueze mbwi okutwa pamwe oviuru. 

Pu pa ri oporise pombamba yayo morukondwa rwa Maheke noviṱo vyounane morukondwa mu mwa ri omberoo yomunane wokarukondwa komatoororero ka Pukiro, omauhonapare wombazu, orutu rwourunga OCASO notutu twovaṱuta novimbumba vyarwe ve eere pamwe nave kara nombongarero ombwa tjinene. Ombongarero ya tara komapu omengi mu mwa ri epuriro ndi: “Tjii ourunga mbwi matu u rondisire pi, matu u tjurura vi tjinga awa tanana?”. Omberoo yoporise morukondwa ya yakura oungundipare wovaporise nave raisa kutja tjiri ovaṱiṱi motjivarero. Monao otje rira ouzeu ku vo okurihaṋa motuveze pekepeke. Ouzeu warwe va yakurire ouhepe wotjikwiririmba tji tji kara atja teka posi yanai tji tja manukire. 

Omaunguriro wapamwe pokati kotjiwaṋa noporise ootjiṋa tji matji yenene kutja tu toṋe mongondjero na motjirwa hi, Hiskia Mbura omuṱuta wa Tjimati ma tja nao.