Esiku ndyoka lyomapashiyono ndyoka hali dhimbulukiwa omumvo kehe momasiku 27 gaSepetemba, nuumvo olya tyapulilwa koNkurenkuru moshitopolwa shaKavango West.
Omugandji gomauyelele muuministeli womidhingoloko, iihwa nomapashiyono Romeo Muyunda okwa ti, omapashiyono ohaga dhana onkandangala meliko lyoshilongo, onkene oge na okusimanekwa.
“Otwa longekidha okudhimbulukwa esiku lyomatalelepo muuyuni oshoka epangelo lyaNamibia olyi li oshilyo shiigwanahangano, onkene otwa tyapulile pamwe,” Muyunda ta ti ngaaka.
Ta fatulula kutya elalakano natango limwe lyokudhimbulukwa esiku lyomapashiyono, okukwatela po omuthigululwakalo pamukalo gokusimaneka nokutalela po omahala ngoka ge na oondjokonona dhi na ongushu.
“Omapashiyono ohaga yambula po wo eliko momindhingoloko oshowo moshilongo, shoka hashi lundulula onkalo oshowo okushonopaleka onkalo yoluhepo,” ta fatulula ngaaka. Omapashiyono oga simana oshoka otaga dhana onkandangala momindhingoloko taga holoka, ngaashi Etosha nomahala omakwawo ga gamenwa.
Iitopolwa oyindji oya tameke okuninga omauliko giipindi ngoka haga hili natango aantu ya za kiitopolwa yi li noyi ili oshowo kondje yiilongo.
Uuministeli womindhingoloko owa ti etompelo lyomatalelepo okuza poonkatu dhopevi sigo opombanda, okueta po eliko lyoshimaliwa.
Omatalelepo ohaga eta iiyemo ya gwedhwa po moshitopolwa nenge moshilongo.
“Uuna aatalelipo ya hokwa pehala ohaya longitha nokuthiga po oshimaliwa shoka tashi yambidhidha natango aayetipo oshowo mboka taya sile oshimpwiyu ehala,”Muyunda ti ngaaka.
Uuministeli owa kumagidha Aanamibia ya simaneke omahala ge na oondjokonona, ngaashi iilongo iikwawo tayi ningi.
Owa popi wo kutya iilongo oyindji otayi hupile momahala goku talelwa po oshowo iiyetwapo yokoonyala yomithigululwakalo dhawo.
Omumvo gwa zi ko, esiku ndyoka okwa li lya ndhimbulukilwa kOmuthiya, kohi yoshipalnyolo okuxwaxwameka nokusimaneka oshowo okukaleka po omuthigulwakalo.
Omuthiya ogu li popepi nomahala ga simanekwa nohaga hili aatalelipo, ngaashi Othithiya oshowo ehala lyiinamwenyo ya gamenwa Etosha.
vkaapanda@nepc.com.na