Omunafikola omukainhu weedula 20, ha fikola moshiputudilo shopombada shaUNAM mOshakati, okwa lopotwa ava kwapo Omaandaxa, nokukufwa oinima yaye.

Olopota ya dilila kopolifi oya tumbula kutya omunafikola vati okwa lefa otaksi nelalakano lokuya kOngwediva koEngineering Campus, vati e ke lihonge pamwe navakwao. 

 Vati eshi ve li mondjila, ovanhu ava a hanga motaksi ove mu ponokela, noku mu pula oinima yaye keenghono vati shihe li pahalo laye. Konima vati ova tameka okupula ovadali voshihakanwa oshimaliwa, keefelende daye, oshoyo ovapopepi naye.

Ovafekelwa vati pefimbo va li tava dengele ovadali voshihakanwa, ova kala tava tumbula kutya ngeenge itava tumu oimaliwa, okaana kavo otave ka landifa po kOmuangola umwe ha lande ounona voukadona. 

Molwaoumbada, olopota oya hokolola kutya ovadali ova tuma oimaliwa i fike poN$3 900. Konima eshi ovadali va tuma oimaliwa natango vati ova kufa oN$780 komavalulilo ombaanga yoshihakanwa, osho sha twala ondado poN$4 680.

 Konima vati ovafekelwa natango ova kufa oshihakanwa ongodi oyasho i na ongushu N$2 500, eshi vati sha etifa omwaalu aushe poN$7 180.

Konima eshi ovafekelwa va mana okolonga oimbuluma yavo vati ovakupula oshihakanwa moluxwa laMatando mOngwediva pombali youfiku.

Evakepo lovanhu, unene ovanafikola vati otashi ningi omukalondjiikilile. Omwedi wa dja ko natango omunafikola umwe okwa ningila oshiningwanima sholudi eli keembudi daShakati nOngwediva.