Mokukwama ntumwa raka zoCabinete omu vageve asi evango lyokatomeno moRundu lyahepa kurugana ngesi , vahepa kuliwapukurura ano ngesi ewapukururo lina pun are ngesi kuna kuza nye vatameke kutomenapo yimuna, kampani ezi zaMeat Corporation zaNamibia mukurona gwazo pamberewa Mwilima Mushokabanji yimo ngoso katente. Evango eli kwaligava epangero ali ruganesa Meatco omu nalikara asi evango lyokurandesera nongombe ntani yimuna yimwe yosinunu yina kutunda kovanafarama monomukunda edi horowero mbali daKavango.
Egano lyokuninka asi vatameke kuruganenamo kwakere ngano mo 2017, noyimaliwa yokuwapukurura yina siki ko N$110 nomilyuna omu vatamekerere kuyitura moyirugana mo 2014. Nampili ngoso kupira nye simaliwa, kwaninkisa elikwamo eli lilirange eyi yatwarederere asi kapi vatameka kuliruganesa moomu vagazarere ano ngesi kuna kumoneka asi tayikaza nye moyirugana. Mokukwama yitundwamo eyi zageve sayitunga zaNew Era mwaKudumogona, konyara yimaliwa yokusiuka ko N$80 nomiliyuna kuna yipumbwa momakwedi aga ntazimwe yipo asi evango eli lika ze komeho nosirugana. ‘’ Ose kuna kara asi evango eli lyomoRundu lyahepa kutameka kurugana ngesi, vatameke kutoma nongombe. Eyi yina hupuko ngesi kuna kara asi evango eli vahepa kuyaligava paveta litunde nye koministeli zonondima. Ezuva lyosilika nye esi ntaantani tulidivise,” yimo ana kutanta Mushokabanji. Apa nye ana kumupuragera gumwe gosayitunga zaNew Era. Kuna kara nye nevango eli vana kumona asi kuvhura kudipaga nongombe 100 mezuva, evango eli kuna kara asi talikarugana momunene koyimuna ngwendi nongombe mokuwapukurura nyama zina kutunda kovanandima wokomuzogo gosirongo.
Ntani simpe navakagava nyama ezi ponze zosirongo oku navakagwana marandesero ngwendi koyirongo muna hamene, Angola, Ghana ntani woMiddle East. Mushokabanji simpe katente asi sitambo sawo kuna kara asi
kuwapukurura vanafarama yipo vagwane mauwa nokureta nye nongombe dawo kokatomeno vayarandese, yipo asi ngesefa zetu zize komeho. ‘’ Sitambo sokutara nawa nawa ezo komeho kuna kara nye asi vanafarama valihameseremo unene mongesefa zangesi. Ose kuna kara nye nositumbukira asi vanafarama vagweanenemo mauwa omu nawo navareta yimuna yawo kwaMeatco. Elikwamo lyangesi kuna kara mulyo unene.” Age kagwedereko asi; ‘’ Yininke yomutaro eyi, kuna kara simwe songesefa zetu ose vegendeso lyokampani ezi. Ose kuna manamo mokulituramo asi nayinye eyi yahepa kuza mouta wakora. ashikololo@nepc.com.na