EENHANA - Ovakainhu ve lihumbata itava wana mo vali mewalanda lEenhana molwaashi paife ova ninga vahapu.

Ovakainhu vamwe paife ohava nangala pedu va hala po omapakete ashike meenduda ova finana mo omanga vamwe ohava nangala vavali kombete.

Ewalanda onhele yomuhandjo hai kala ovakainhu ve li momateelelo nohai kwafele ovakainhu opo va kale ve li popepi noshipangelo ngeenge tava fetwa.

Ewalanda ola fimana kovakainhu hava di komikunda dokokule molwaashi paife ihava ende vali eendjila diledile oku ya koshipangelo.

Omukulunhu ha tonatele ewalanda Saima Imene okwa hokolola ta ti efiku keshe ewalanda ohali yakula omwaalu muhapu wovakainhu ve lihumbata.

Okwa ti paife mewalanda omu na ovakainhu 140 ve uya okuteelela okupulumuna.

“Kashiwa okushunifako omukainhu e na eteelelo e uya kewalanda molwaashi naye okwa pumbwa okukala popepi noshipangelo ngaashi naanaa ovakainhu vakwao,” osho a tumbula ngaho.

Onghee okwa ti ngeenge omukainhu e ya kewalanda ohe mu lombwele e ke lifininike monduda omu mu na vakwao.

“Oshixwepo eshi omukainhu e li popepi noshipangelo, noshi dulife eshi omukainhu e li keumbo,” Imene ta ti.

Okwa ti omwedi Aguste neudo owa didilikwa wa dja ovakainhu vahapu ve uye kewalanda.

Pefimbo Kundana a talela po ewalanda mexuliloshivike, ovakainhu ova hokolola tava ti ova pandula kelelo lodoolopa yEenhana eshi la eta po ewalanda ashike ola tungwa lishona.

Lusia Kafine a dile komukunda Oshimumu okwa ti eshi oshikando oshititatu te uya okuteelela okupulumuna kewalanda.

Ovakainhu ova weda po tava ti ove na omhito yokuponokelwa kookalyamupombo molwaashi kewalanda kaku na omukeleli womaliko koshivelo.

“Ngeno kappa li ewalanda ngeno ohatu mono oixuna yokumonena ounona momaumbo ile meendjila ngeenge twa uka koshipangelo,” Kafine ta ti. fhamalwa@nepc.com.na