Ehangano lOshana Building Block ola tungila odoolopa yaShakati olama yokunana ovaendanandjila ngeenge tava talele po ile tava piti modoolopa oyo. Omupopiliko wodoolopa Katarina Kamari okwa ti Oshakati oyo odoolopa yotete monooli ya mona efano loludi eli.

 Okwa twikila kutya okakuma oke lile po okufeweka nokunana ovatelelipo keenhele da yooloka ve uye kOshakati.

 Okwa ti yoo oli lile po okuyambidida ovaendanandjila, unene ngeenge tashi ya poku va pukulula apa ve li notava ende efimbo olo.

“Onda hala okupandula Oshana Building Block, eshi ve tu dimbuluka, mokuyambulapo odoolopa, nefano loludi eli. 

Eshi oshimwe shomoinima twa li twa hala efimbo lile,” Kamari ta ti.

Okwa ti yoo otaka nane ovatalelipo vahapu va yooloka modoolopa, nota indile ovanangeshefa va yambidide mokutunga oinima tai dulu okunana ovaendanandjila.

Kamari okwa ti ota kunghilile Ovashakati va kaleke efano li yela efimbo keshe.

“Elelodoolopa ola tulapo omilandu dokupa ovanhu ava tava ka ningila okakuma ominyonena ehandukilo, pehe na oudano,” ta yelifa.