OKANKOLOS – Oshikoto kharib di ǁgau!nâs direktersd, Aletha Eises ge skolǀgôana ge ǂgan, in ǁîn skola aimâi ǀhûhâsi ǂhaitsi ǂhawegu (social media) ai hâsoreǂgâs xa. Eises ge nēsa ǂoa ge wekheb ais ge Okankolo ǁhûi!nâǂharis !nâ ǁgoe Onguti Sekondere Skoli tawa 2024ǁî kurib di ǀasa skolkurib tsoatsoas di ǂhanusi ǀhui-ams tsî ǁnā ǀkharib !nâ mâǂoa hâ sîsenna ge dīna ǂan!gâs made mās ǀkha ǁaxa i soab !nâ ǁnāti skolgôana gere ǂgaoǂgao!nâ. ǂAuna skolǀgan ge Twitters, Facebooks tsî nau hâ ǀhûhâsi ǂhawegu ai hâ. Nē ǀgôan ge Facebooksa xu ǁgôaxa tsî ǁîn ǂkhanin ǀkha !oa!ū nî ǀhao,” tis ge gere mî. 

ǁGau!nâs direkters noxopa ge mîs ge, skolǀgôan tā ǀuni !âide ǁkhāǁkhāsens !aroma nî !âu !khaisa, xawen nēsi ǀnai nî aiǂhomisentsoatsosa. “Nēsi da ge nî tsoatsoas ge, ǀnîkhamikō ǁkhâgu guigu ǀuni !âis !aroma !gau hâ amaga,” tis ge ge mî. 

ǁKhātis ge Eisesa ǁgûn ai ǂgansa ge dī, in ǁkhāǁkhāsens !aroma !gâi ǂūsiga ǀgôan !nâ !hanas ase ǁgaragu tsî ǂhanu tanisenǀgauga hoaǁae ǁnaetib ase ǁgâudi tawa ǂgaoǂgao!nâ. 

Direkters ge nē kurib di ǂgaiǂams “ǀGuipa sîsenǀhaosa, dā!harode ūs mâǂoa hâ sîsenni !aroma’ ti hâsa gere ǀgonǀgon!gao. ǁKhātis ge ǀhûǁarebe hâ sîsenǁareb ǁgûn tsî skolgu ǁaegu hâb di ǂhâǂhâsasiba gere aimâise. 

“ǁGûn ge ǁgau!nâs sistemsa nî ǂkhâ!nâ î da hûǁarebese sa sī!nâ tsî ais ǁga ǀgapi !harode skolgôana sī!nâsa !oa ǁgū,” tis ge ge mî. Ai!âs ge ǁîsa skoldanana ge ǂgan, in ǁîn ǁgau!nâ-aon tsî skolgôana ǂgaoǂgao!nâ mâǂoa hâ sîsenna dīs !aroma tsî tā ǁîna nî !aob !nâ mâi khôaǁnâse ī. “!Aob !nâ ūhâs tsî ǁores tsîn ge ǂgaeǂguis di !â tama hâ, xawe da ge ǀgaisa ǁôab tsî tsamtsi!nâ ǂgaob tsîn ǀkha  nî ǂgaeǂgui,” tis ge Eisesa gere ǀawemā. Direkters ge Oshikoto ǀkharib ge ǂoa ge kurib di Xrat 12 di ǀuni !âitsâdi !nâ hakaǁî !harosa xu hûǁî !haros ǁga a ǁnāǁgôa tsî nau ǀkhāb ai Xrat 11 !nâ ǁkhaisaǁî !harosa xu hakaǁî !haros kōse a ǂharos ǂnamipe ǁîs gowaǀsa gere mā. 

Okankolo ǁhûi!nâǂharis di ǂgiǂgosi awemā-aob, Hans Nambondib ge direkters di mîdi ha sîsenǁares ai ge hâ ide oasase !khō!gâ tsî gere mî, hoa !âǀhuru-aon aib !ereamxasiba ǁgoe gôana nî ǂkhâ!nâ tsî ǂgaoǂgao!nâse is diba !khaisa. -Nampa