OSHAKATI - Ongoshinakugwanithwa shoNamibia Fish Consumption Promotion Trust (NFCPT) oku fala oohi koshigwana, ehangano olya patula ositola mOndangwa oshiwike shika.
Ositola ndjoka oya ningi onti-18 moshilongo.
Okuza momumvo 2003, k
oohi okwa li tadhi landithelwa mekondeyina, moka mwa kala itamu gwana oohi adhihe tadhi pumbiwa koshigwana.
Mongashiingeyi ositola yoohi oya patuluka nelalakano lyokugwanitha oyendji taya pumbwa oohi momundhingoloko gOndangwa.
Oositola dhoohi odha patulula omiyelo dhawo miitopowa ayihe yoshilongo, noya kuta aaniilonga ya thika po150. Momushangwa, minista goohi noonzo dhomefuta Derek Klazen, ngoka gwa leshwa kungoloneya goshitopolwa shaShana Elia Irimari okwa ti, ehangano lyo-NFCPT olyi na oshinakugwanitha shokufala oohi popepi noshigwana moshilongo.
Klazen okwa popi ta ti, nonando ehangano lyo-NFCPT tali indjipaleke oositola dhoohi moshilongo, otali shi ningi, nondando yoshimaliwa tayi hokitha oshowo tayi vulika kukehe gumwe.
“Uuministeli okwa li wa gandja ookota dhoohi kukehe ngoka a li ta vulu okwiinekelwa nooproyeka oshowo ooprogalama ndhoka,” ta fatulula ngaaka.
Okwa fatulula wo kutya einekelo ndyoka olya kwatela mo okugandja wo omalongo koshigwana gokuteleka oohi momikalo dha yooloka nelalakano lyokumona uundjolowele tau zi moohi. Ta ti, oohi ohadhi gandja iitungithi yolutu yongushu, onkene kehe gumwe okwa pumbwa okukala ta li oohi, ihe shoka otashi ningwa ashike ngele tadhi vulu okulandwa kukehe gumwe omolwondando ombwaanawa. Suzan Ndjaleka, omunashipundi gwehangano lyo-NFCPT okwa ti, nonando ya ningi ethimbo taya longele mehala inaali gwana nawa, shoka kakwa li she ya keelele okweeta oohi popepi noshigwana.
Ndjaleka okwa ti, ositola ndjika ompe oya tulwa popepi, nakehe gumwe ota vulu okuthika po, mwa kwatelwa mboka haya zi kuushayi.
“Ondangwa ondoolopa ndjoka yi li po pepi noondoolopa ngaashi Eenhana, Oshakati, Ongwediva, Outapi, Omuthiya nosho tuu,” ta ti ngaaka. Okwa kumagidha wo aaniilonga mboka taya longo mositola ndjoka ompe yoohi ya ninge okuume naantu, opo wo ya mone ompito yokuxwaxwameka esimano lyoohi moshilongo.
Mayola gondoolopa yaNdangwa Paavo Amwele okwa ti, ositola yoohi ndjoka otayi ka dhana onkandangala pamukalo gokuhumitha komeho ondoolopa oshowo ekoko lyeliko mondoolopa.
vkaapanda@nepc.com.na