Elelodoolopa yaShakati ola hoolola Leonard Hango a shune koshipundi oshikando oshititatu ongamayola wodoolopa.

Omupedu waye Puyeipwa Elifas natango okwa shuna koshipundi, oshoyo elelo lokimitiye Maria Mutumbulwa, Hofeni Mutota naRuusa Frans navo ova shuna koipundi.

Hango okwa ti ye okwe lilongekidila okutwikila okutula komesho eemhumbwe dovanhu vomodoolopa yaShakati, noku di kandula po.

Okwa ti eemhumbwe ongaashi okueta omakwafo popei novanhu oshoyo okuyandja eemhito diwa doilonga, nokunawapeka eliko lodoolopa.

“Ohatu kendabala yoo natango okueta po oinima ipe oyo tai dulu okuvatela ovanhu vahapu modoolpa oshoyo oku va amena momikalo dihapu,” Hango ta yelifa.

Hango ta ti yo momukokomoko wodula ei elelo ola kendabala okumana opoloyeka ya li ya nuninwa okutunga Extension 11 oshoyo 12 mEhenye, odo di shivike pambelewa ongOshakati North.

Etembu lovanhu ava ve li kolukanda laShoopala onghene li li metifa. Okwa ti elalakano lavo ngeno okutembula ovakalimo aveshe ava ve li molukanda laShoopla va ye kOnawa, oko ovanhu tava ka pewa eenhele dokutunga oshali da longekidwa nawa, di na omeva nolusheno, oshoyo eepate di li popepi.

“Elalakano okushendja eenghalamwenyo dovakalimo vomodoolopa opo va dule okulonga noupu,” Hango ta ti. 

Ta weda po kutya opoloyeka yakula natango oyo i li metifa, omatuliko eetaksi dokuya kOndangwa oshoyo onhele yomatulikilo eetaksi dokEndola nOkatana nayo oi li metifa lokulongwa.

Hango okwa ti yoo okwa hala okukunghilila ovanhu avashe vomOshakati va tule moilonga okufuta oishoshela yavo yokomwedi, opo va dule okunenepeka odoolopa.