Okavidio hoka ka kala taka taambathanwa komalungula kutya uuchepisa wedhina Hello anuwa owa longelwa omakende ga nyanyulwa, oka etitha ehangano ndyoka lyi yamukule meendelelo kutya shoka tashi popiwa odhanakalindi.
Komalungula okwa monika omuhwahwameki gwongundu yo-NEFF, Micheal Amushelelo ta pula uuministeli wuuhaku nonkalonawa opo wu ningile omakonakono uuchepisa wa shangwa Hello, oshoka anuwa owa longelwa omakende. Uuchepisa mboka otau shingithwa moositola dhoRani.
Momushangwa gwa pitithwa kehangano lyoHello Nax momasiku 29 gaJanuali nuumvo, owa ti oya ndhindhilike kutya omalundilo ngoka oga etwa po okukakeka edhina lyehangano sho tali shi enditha nawa mongeshefa.
“Out na owino yiikulya yomimvo 20, nakehe shoka hatu longitha okweeta po iikulya yetu ohashi zi komahangano ge na owino yopombanda noga pewa epitikilo lyokwaandjaneka iikulya,” ya fatulula ngaaka. Hello Nax ta shanga kutya ohaya talelwa kepangelo okukwashilipaleka kutya kehe shimwe oshi li nawa notashi longwa pamilandu dha tulwa po, shoka hashi ya pethitha epitikilo okulanditha iikulya moositola. Ehangano ndyoka olya gwedha po kutya oya ningi omapekapeko moositola ndhoka tadhi landitha uuchepisa mboka, ihe inaya mona mo omapuko ngoka taga nyenyetwa mokavideo ke li komalungula.
“Okavidio hoka oka taambathanwa komalungula, hoka taka nyatekitha edhina lyetu, ihe natse otatu tsikile okuninga omapekapeko sigo twa mono ngoka e ya po nomalundilo ngaka, opo tu ungaunge naye,” ya yelitha momushangwa ngaaka.
Natango oya thindi omuthindo kutya iikulya yawo ohayi talelwa omanga inaayi landithwa, opo ku talike ngele oya opalela okuliwa koshigwana.
Ya ti, ohaya landula oompango nomalandulathano agehe ga tulwa po omanga inaaya shingitha iikulya yawo.
Omukuluntu guundjolowele melelo lyondoolopa yaShakati Kornelius Kapolo okwa ti, okwa li a ningi omapekapeko guuchepisa mboka okuza moositola dhoRani.
‘’Okwa li nda yi mositola yimwe yoRani mOshakati, ihe okwa li wa pwamo, okwa li twa hingi tu ka tale kOngwediva, hoka twa li twa adha uuchepisa woHello,” ta hokolola ngaaka.
Ta ti, omayamukulo gawo oga yela, uuchepisa mboka kawuna nando omakende ngoka ngaashi tashi popiwa mokavidio taka taambathanwa komalungula.
Uuministeli wuuhaku owu li metifa okushanga omushangwa, okugandja oshizemo shomakonaakono ngoka wa ningi. -vkaapanda@nepc.com.na