ǂGanamsendi !hūǁîsis ǂkhanin didi ge ai!gû rase ra ǂharo tsî ǀgaisa ǁgâiba Ministeris !Hū!nāsi ǁHōn, !Hūb !nâ ǂgâxa tsî ǂoas, !Norasasib tsî ǁAwosasib dis ai ra ǁgui, ǁnāpa gu gaxu lainga tsēkorobe ǀAeǁgams beros tawa ra hō!âhese.
Nē ministeris ge ǁîs di ǀgapiǀgauxa ǂganǀgauba ūhâ dana beros âsa, ǂganǀgaub âsa N$813 miljuns ai hâba ǂoa ge kurib di ǀHōǂgaeb ai ge doeǂgâ!nâ.
ǁGūbas nē asa dana beros dis ge ǂgaoǀkhāsa !harib ai hâ !oabade Namibiaǁîn tsî !haokhoen tsîn hoana mās !aroma.
ǀGūǁaes ge Nampas ǀkha ūhâ i dî!nâǁgamǁare-i !nâs ge ministeris di mîgowaba-aos, Margaret Kalosa ge mî, ministeris nēsi ǁnaetisase ǁaero-i ǀgaiba ǀgaisa ǁgâiba ra hōsa, !gōsase Mantaxtsēdi tsî ǁkhâbǀunidi ai, khoen hîa !kharagagu !oabade ra ôana xu.
Nē mâsib, khoen kaise ǂgui !gôagu !nâ ra sība oresa hōbas ases ge ministerisa !kharaga dīgauga ge ǂgâxa-ū, aiǁgause ǁkhāǁkhāǂuisentoa hâ student hîa sîsenose hâna ǂgaeǂgās tamas ka i o ǀnî sîsenaona ǁîn di administrsi sîsen!khaiga xu !oabade mās !âgu !nâ ais ǀkhāb ai sîsen kais khami.
Kalos ge ge mî, ǁîn ge 2022 !nâ sîsen rase ǁkhāǁkhākhâisens proxramma a !amǂgā tsî ǁkhāǁkhāǂuisenhâ studentna ǂhâbasa ǁkhāǁkhākhâide mā tsî ra sîsen kaisa.
Nēsis kōsen ge 99 studentna nē proxramma xuy !gâi!gâ hâ.
“!Nāsa !nādeb ge nē sîsenǀgauba hâ a ǁgâiba r ūǁnâ tsî ǂganamsendi khoen died îbe gaxu tama ǁaeb !nâ ra dīǀoaǀoa. Nausan hoaǁae ra dītsâ ǁîn ǁkhā hâna, xawe gu gaxu lainga noxopa ra hō!âhesa,” tis ge ge mî.
!Nāsases nē ministrisa ra !khō!oa ǂganamsendi ge ID kartdi di ǁgoe!gaugu, ǂhunuma ID kartdi, ID kartna ūǁnâs, !onkhaohâ !naeǂkhanigu, !naeǂkhanigu ǁgoe!gaun tsî visa ǂkhanina.
“Sida ge ǀgôan di ǁgûna ra ǂgan, in ǀgôan âna !naes khao!gâ xoamâi, nēti ī sertifikatgu supuse !hûb a ǂhabase hâ ǀaeǁgâudi tawa a hōsa amaga.
Nē ǀgauba sîsens ge buruxase !gôaga nî ǀoroǀoro khoen hîa ǂhunuma ǂkhanin !nubusina ūhân din diga.” tis ge gere !kharu!kharu.
Kalos ai!â gere mîs ge, gui timî tsîs ge ministerisa online ǂganamsende nē kurib di ǀKhū-khâb !nâ a sîsentsoatsoa kaisa xun ǁîna 900 passport ǂganamsendi tsî 1 360 !nubu ǁaerob !aroma a ǂhâbasa visa ǂganamsende ge a !khō!oasa. - Nampa