A akalimo yomonooli oya taalela uupyakadhi wiimuna yawo tayi yakwa kiiguda nenge nomomakuti pethimbo yi li kuulithilo.
Aakalimo yomiitopolwa ya yolooka yokoonoli otaya nyenyeta kutya iimuna yawo otayi yakwa po.
Taya ti, unene ohayi yakwa po kaaniilonga mboka ya kutwa ongaalithi yiimuna.
Omupehakuluntu gwopolisi Moses Simaho okwa ti, oshiningwanima oshitalala, oshomulumentu gwomimvo dhopokati a yi konima yekumba koRuacana sho a adhika niimuna kaayi shi ye.
Simaho okwa ti, omulumentu ngoka okwa li a yi niimuna yaantu kaashi li papitikilo lyamwene gwiimuna oshiwike sha zi ko.
Okwa li a adhika niimuna yongushu N$54 600.
Moshiningwanima shimwe, omulumentu gwomimvo 30 okwa mangwa po kopolisi moshitopolwa shaMusati sho kwa li a yaka oshikombo noku shi dhipaga.
Simaho okwa ti oshiningwanima shoka osha holoka oshiwike shika momukunda Oshivanda ShaNghatanga.
Omulumentu ngoka anuwa okwa li i iyakele koshigunda shaantu e ta yaka ko oshikombo shoka shi na ongushu N$2 500.
Sem Shipanga gwomoshitopolwa shaMusati okwa ti, oyendji oya kutu Aaangola mboka kaye ya shi nawa.
Ngele ye ya momindhingiloko dhawo e taya tseya mo nawa, ohaya ka yaka po iimuna yawo.
“Otatu kanitha iimuna noonkondo, ngele oya pitithwa moAngola ihatu yi mono we, ihe ondi wete kutya uupyakadhi oongamba ndhoka dha weya pokati kaAngola naNamibia,” ta ti ngaaka.
Shipanga ta ti sho ya kala nale omimvo dha piti, oongombe nando odha ningi ethimbo dha kana, ohadhi ka monika oshoka omo dhili moshilongo, ihe nena ngele odha kana, ihadhi ka monika we, oshoka moshilongo odha hingwa mo.
Sheehama Nelongo gomomukunda Omapopo okwa ti, uupyakadhi wiimuna tayi kana owu li apehe.
Yamwe ohaya ka landitha kaadhipagi yoongombe, haya landitha oonyama omanga yamwe haya pititha okuya moAngola.
“Shika otashi tu teya omitima. Tse katu na mpoka hatu longo ihe otwa ikolelala ashike moongombe,” ta nyenyeta ngaaka.
Ta ti, oya ndhindhilike kutya uupyakadhi mboka ohau etwa kaalithi yiimuna, oshoka oyo haya kala ye li koohambo oshowo haya litha iimuna.
Ta ti, oya kanitha nale oongombe momumvo ngoka gwa li ko gondjala, ihe natango otaya yugwa iimuna yawo.