Festus Hamalwa

OMAFO - Minista womangeshefelo Lucia Iipumbu okwa ti omaulikilo oipindi naa pule komesho molwaashi otaa eta oyuuyemo meedoolopa.

Onghee okwa pula  omalelo eedoolopa opo a twikile nokuninga omaulikilo oipindi.

Iipumbu edi okwe di popya pefimbo kwa li ta patulula Omaulikilo oipindi aaHelao Nafidi oshivike sha dja ko.

Ovanangeshefa 230 va dja koitukulwa ya yooloka otava kufa ombinga mokulandifa oilandifoma momaulikilo oipindi.

Eshi oshi li oshikando 16 Helao Nafidi ta ningi omaulikilo oipindi okomudo.

Oipindi oya tamekele momafiku 20 Kotoba notai xulu momafiku 4 omwedi ou.

Minista okwa ti ouministeli wavo otau twikile nokuxwaxwameka omalele eedoolopa noshiwana mokuninga omaulikilo oipindi lwoikando ya yooloka shaashi otashi eta po eemhito doilonga.

Onghee Iipumbu okwa ti okwa hala okumona eengeshefa tadi xumu komesho. “Oshiwana nashi longe nelitulemo okuhambula po eengeshefa davo diha teke po,” ta ti.

Okwa kumaida oshiwana opo shi kale tashi longifa ounongo okueta po oilandifomwa yavo vene ngaashi oihongomwa yOshiwambo noshoyo oikulya yOshiwambo.

“Onga Ovanamibia nafye otwa pumbwa okulonga oinima yetu ndele hatu landifa kovapashioni,” ta ti.

Okwa weda po ta ti ovanangeshefa otava shakeneke epangelo ondjilakati okueta po eemhito doilonnga noshoyo okulwifa ondjala noluhepo.

Okwa kumaida yoo vali ovanyasha opo va kale tava kufa ombinga moinyangadalwa younamapya tashi pitile mokuninga oikunino yavo nokulandifa oikunomwa ya yooloka  .

“Ka leni ta mu yambididafana. Ovanangeshefa nava topolafane omayelele nghene ve na okuhambula po eengeshefa davo,” ta ti.

Moshipopiwa shaye mayola wodoolopa yaHelao Nafidi Darius Shaalukeni okwa ti omaulikilo oipindi okwa dana onghandangala ya kula mokuhambula po odoolopa yavo.

“Otwa eta mo eputuko modoolopa yetu ngaashi okuninga po okapale ketango nosho tuu.Onghee oshimaliwa osho hatu mono momaulikilo oipindi ile okudilila moshiwana ngeenge tashi futu omayakulo amuni oha shi longifwa okuhambula po odoolopa,” Shaalukeni a weda po.

– fhamalwa@nepc.com.na