Aantu yeli lwopo-20 oya si omanga yeli 54 ya mono iiponga pokati komumvo 2022 no2024 miiningwanima ya yooloka yomaipumomumwe pokati kaantu niiyamakuti.

Kakele komaso, aantu oyendji oya kanitha wo omaliko gawo, sho iiyamakuti, unene oondjamba hadhi ponokele omapya gawo – unene pethimbo ndika sho ye na omatanga momapya.

Omugandji gwomauyelele muuministeli womindhingoloko Romeo Muunda okwa koleke oshiningwanima oshitalala momukunda Otjorute moshitopolwa shaMusati moka omulumentu gumwe a si iiwike iyali ya piti sho a dhipagwa kondjamba pethimbo kwali ta kambandhala okuyi hinga mepya.

Ethimbo ndika olya tseyika ondjamba hadhi zi mo momatonatelwahala tadhi ende mokati kaantu oshoka ota tadhi hilwa komatanga ngoka geli momapya.

“Aanambelewa yanatiili oya kala momundhingoloko moka taya shiike yo taya tala onkalo yomaliko ngoka ga yonagulwa momapya,” Muyunda ta ti ngaaka.

Ta gwedha po ta ti, shoka hasho oshikando shotango, iiyamakuti ohayi ende tayi kongo uuhupilo omolwa ondjala nenota.

“Ota tu kumagidha oshigwana shi gandje ompito kaanambelewa opo ya longe iilonga yawo, ihe hakwi ikuthila ooveta momake gawo,’’ ta kumagidha ngaaka.

Ta ti, oshigwana nashi longithe oompito adhihe okugamena omahala gawo kaaga ponokelwe koondjamba.

Muyunda ta ti, ngele aanambelewa ya mana nomakonakono, okugongela uuyelele, otaku ka pitithwa olopota opo ku futwe shoka sha yonagulwa koondjambo ndhoka.

Ta popi ta ti, omumvo gwayi uuministeli owa longitha oshimaliwa shi thike poomilliona N$24.1 okufuta ekanitho lyoomwenyo oshowo omayonagulo niiponga ya etithwa kiiyamakuti moshilongo.

Muyunda okwa ta ti, owa longitha oomilliona N$24.1 okuza ashike momumvo 2019 sigo omumvo gwayi.

“Momumvo 2022 oomwenyo dhaantu dhi li 15 odha faalelwa kiiyamukuti omanga mo2023 dhi li mbali dha kana omolwiiyamukuti. Aantu ye li 54 oya ehamekwa nokumona iiponga,” ta ti ngaaka,

Ta ti, muule woomvula dhoka uuministeli owa futu oshimaliwa shi thike N$2 963 852 shiimuna ya lika po kiiyamakuti, oshowo oshimaliwa shi thike N$2 569 200 shomapya ga yonagulwa kiiyamakuti.

Ta gwedha po ta ti, natango uuministeli owa longitha oshimaliwa shi thike N$640 000 okufuta iiponga ya ningilwa aantu oshowo oshimaliwa shi thike poomilliona N$3 shoomwenyo dhaantu ya dhipagwa kiiyamakuti.

“Natango oshimaliwa shi thike N$14 695 110,00 osha li sha futwa komahala ga gamenwa ga yooloka omolwuupyakadhi hau etwa kiiyamakuti,” Muyunda ta ti ngaaka.

Ta gwedhwa po ta ti, okuza 2019 oohekita dhi thike 2 637 dhomapya odha halakanithwa kiiyamukuti, uunene koondjamba, omanga okuza pokati komimvo 2022 no2023 oohekita 330 odha li dha hanagulwa po.

Muyunda ta ti, iimuna yi li 862 oya lika po kiiyamakuti okuza 2022 sigo 2023.

“Uupyakadhi wekanitho lyoomwenyo oshowo ehanagule po nemonitho lyiiponga kiiyamakuti onkene tau tsikile. Shoka hashi tula oonkalamwenyo dhaakwashigwana moshiponga,” ta ti ngaaka.

Helena Kasheeta-Ashili gwomokunda Olutsidhi moshikandjohogololo Otsandi okwa ti, epya lye oshiwike sha ziko okwa li lya ponokelwa koondjamba 20 noku hanagulwa po thiluthilu.

“Iilya yandje oya hagulwa po, ina mu hupa nando osha,” ta nyenyeta ngaaka.

Ta ti, omapya ogendji momundhingoloko gwawo oga hanugulwa po koondjambo, ndhoka dha lamba mo omatanga gomaliwa nomanuwa.

Aakalimo moshitopolwa moka otaya nyenyeta kutya oye na uumbanda oshoka oomwenyo dhawo nadho odhi li moshiponga.  Taya ti, uuministeli ohawu futu ashike N$1000, mohekta yimwe, ashike oshimaliwa shoka inashi gwana, sho itashi yelekwa niimaliwa ya longithwa okulonga epya. - vkaapanda@nepc.com.na