Lucas Tsamseb a shivika nawa nedina Irivari okwa ninga eemwedi nhee modolongo paife konima eshi kwa li a kwatwa po omudo wa dja ko kOshivelo muDesemba.
Irivari ota tengenekwa e li pomido 20 nokwa shivika nawa okupitila komalungula eshi ha fanekwa ouvidio voiyolifa.
Omukulunhu wopolifi moshitukulwa shaShikoto Commissioner Teopoline Kalompo-Nashikaku okwa hokolola ta ti Irivari okwa kwatwa po konima eshi a teya onduda yopolifi omo hamu tulwa oinima ei hai kufwa ovanhu peinda lopolifi pOshivelo.
Irivari vati okwa longifa oshitenda nokuteya omuvelo monduda omo, nokonima okwa kufa mo oipakete yomalodu ouwhiskey vaAngola itatu.
Opolifi oya hokolola tai ti oshiningwanima eshi osha ningwa mokati koufiku lwopotundi 00h45.
Irivari oku li mokakuma koshitaashi yopolifi mOmuthiya nota holoka momhangu loshikando oshititatu momafiku 25 omwedi ou.
Okamatyona aka Irivari okwa li yoo vali ka kwatwa po momudo 2021 mekwatafano loshibofa shekwatonghonga omo kwa li tava fekelwa kutya okwa kwata omukainhu onghonga.
Okwa li a pewa e lifutile mo modolongo noshimaliwa N$2 000 konima eshi oshiwana she mu yambidida noshimaliwa shokulifutila mo modolongo.
Irivari ou okwa li yoo vali a nyika ounghundi omudo wa dja ko nokwa pangele meembete oule wemweedi nhee.
Okwa kala yoo vali a taalela omashongo okuhe na oikulya konima eshi kwa li a lekelwa moshipangelo