LUHONONO – Muyemeli wasilalanda sa Kabbe ya Mutulo Bernard Sisamu, ubulela kuli bakeñisa muunda ni kutokwa pula hakusikaba nikutulo yende. Naize buñata nebasika lima bakeñisa pula yene isika nela. Buñata bwa bayahi ba Kabbe ya Mutulo ni Mbowela bapumezwi kuya kwatolopo ya Katima Mulilo bakeñisa muunda. Silalanda sa Kabbe sitasezwanga kimuunda bakeñisa kuli sifumaneha mokupatami, mihato zemibeli kuya kuye ketalizoho famayemo aliwate.”Muunda notibisize sikiliti mwakweli ya Yowa kasamulaho akunela hahulu kwa pula.

Kukwaeza mwamukwakwa ozwa Katima kuya Luhonono mutu ukona kubona masimu asina mbonyi yeyemi ili kusupeza kutulo yebusula. “Ofesi ya Ngambela iswanela kupatalaza linanga mwanaha kaufela. Nihaike butata kibwasikiliti kaufela sa Zambezi, hanikoni kubulela kuli kuna ni munzi mwasilalanda saka one ukutuzi. Mwasilalanda saka kufumaneha batu babalikana 9000. Kaufela abona ba mwabutata, mi batu batokwa lico za linanga,”natalusize.

Nabulezi hape kuli batu baitimelanga lico, kono unumwaha hakucwalo. Ubulela kuli pula nesiile kunela mwakweli ya Yowa. Induna wamuzni wa Luhonono Thadius Matengu niyena nanyatezi kutokwa kutulo sakata.  “Muunda noitahanezi, pula nelyehile. Kacwalo, batu nebapalezwi kulima, bane balimile hakuna zene bakutuzi. Batu batokwa lico kaputako. Muuso uswanela kutusa sicaba nikufa lico zalinanga,” nekubulezi Matengu.

 Mulimi mwasilalanda sa Kabbe ya Mbowela Lawrence Shinkisha, yo simu yahae netibisizwe kimuunda ni yena usaba tala. “Masimu aluna natibile. Haluna sakuca. Kutata hahulu, muuso uswanela kulutusa,”nabulezi. Kono hakutaha kwamafulelo libaka zeñwi libonahala butala kasamulaho akukala kwamezi amuunda. Katengo kakabona zalinako zetata mwasikiliti sa Zambezi neka kile kakupa lituso zecwale ka matente, lico, mamatiresi, litino zamwamezi, mainjini amalonji, mafula, lipatelanyana zezamaya ni milyani yakulelekisa minañi ni kualafisa tulimbalimba. Zeo neli likupo zene lilemuhilwe kasamulaho akupotela likolo zelobañwi zene taselizwe kimuunda mwalilalanda zepeli za Kabbe.