New Era Newspaper

New Era Epaper
Icon Collap
...
Home / Kamwi: Onooli oyo unene ya taalela eshongo lomalaria

Kamwi: Onooli oyo unene ya taalela eshongo lomalaria

2022-08-04  Festus Hamalwa

Kamwi: Onooli oyo unene ya taalela eshongo lomalaria

Festus Hamalwa

Minista mukulu wouhaku nonghalonawa Richard Kamwi okwa ti oitukulwa yokonooli oyo imwe ya didilikwa hai kala ya taalela eshongo linene ngeenge tashi ya poikwafifo yoshidu shomalaria.

Okwa ti unene tuu ovanhu hava di komikunda ohava kala tava mono oixuna nghee ve na okukala tave liamene koshidu malaria shaashi ihava kala ve na oikwafifo ya wana ngaashi eenete dokulikelela keemwe. Onghee okwa ti osha fimana opo ouministeli wouhaku u kale wa yandja oikwafifo ya wana koshiwana hashi di komikunda opo va dule okulwifa malaria.

Edi Kamwi okwe di popya pefimbo a li ta yandje oikwafifo koumimisteli wouhaku moWindhoek Etivali.

Okwa yandja oikwafifo ngaashi eenete dokukelela eemwe, oushina wokukonakona ovanhu ngeenge ove na omalaria noshoyo oikutu yokudjala ngeenge ovanailonga vouhaku tava ka pombela momaumbo nosho tuu oikwafifo imwepo.

Oikwafifo ya yandjwa oi li pongushu yoshimaliwa N$1 205 211. 19. Kamwi ou e li yoo vali onga omukalelipowiliki woshidu malaria woilonga ihetatu moSADC okwa ti ota twikile okuyambidida oshikondo shouhaku opo ku kelelwe oshidu Malaria kovanhu noshoyo kounona.

“Malaria oshidu shimwe eshi hashi dulu okudipaa ounona vashona noupu ngeenge okaana inaka tuvikilwa monete. Onghee osha fimana opo ovadali va kale tava tonatele ounona wavo efimbo keshe opo vaha like keemwe,” Kamwi ta ti.

Okwa weda po ta ti oshiwana nashi kale tashi topolelafana ouyelele nehongo nghee shi na okukelela Malaria noshoyo okukala tashi lopotele ovanailonga vouhaku ngeenge shi na omadiliko amalaria. Moshipopiwa shaye pefimbo ta tambula ko oikwafifo minista youhaku Kalumbi Shangula okwa ti oikwafifo ya yandjwa otai ka eta elunduluko lakula okukeelela Malaria.

“Ovanailonga vouhaku eshi tava ka ya momudingonoko otava ka kala tava longo noupu shaashi ova pewa oikutu yokudjala ngeenge tava pombele. Onghee eshi otashi va tu omukumo opo va longe nondjungu nokuyakula nawa oshiwana,” Shangula ta ti.

Okwa indila ovanangeshefa momidingonoko noshoyo omahangano opaumwene opo a kufe ko oshihopaenenwa eshi shokushakeneka epangelo ondjilakati mokulwifa malaria.

fhmalwa@nepc.com.na


2022-08-04  Festus Hamalwa

Share on social media