Nkwate, ogu ana kara gwaSWAPO mosintokorwa zaKatutura zontjima ntjima Ambrosius Kandji, ogu kakere asi moutano una puko kavamukwete morwa yirapota eyi yivali, age ngesi kakamonekere kompanguro moKatutura komeho zomuhahende.
Kandji ogu kakakere sikondovike modorongo vana kutumbura asi Seeis, kavamukwete moutano unapuko poyiha yonovili 22h10 konyima tupu opo kavakamutuliliremo yirapotwa oyo yivali. Age kuna mutamba kuzonagura yiweka yomuntu ntani kutuka mutungimo momukunda. Mokukwama muhuyungilipo vaporosi komisaragona Kauna Shikwambi, katente asi age kavamukwete morwa kuhomokera mukadi nokumutukagura ntani kulika uta mukadi ogo pembo lyendi lyakara moKatutura moVenduka.
Shikwambi katente asi kansela gwaSWAPO,kavamukwete konyima tupu opo mukadi kakapatwilire sirapotwa kuhamena Kandji, mokutanta asi age kuna muzundura kumwe nokumuveta mosipara kumwe nokumulika uta asi ngano tamuroya. Mokukwama yitundwamo yaNampa, age kazire kembo lyakansela ngano akalitjangese kweyi vana kugwana posiruwo esi vana kutumbura asi EIG, morwa ehundiro lyendi lyokuhova kwakalinyoka, morwa age kwakere murugani pwanare ano pwantani age kapi ana kurugana hena.
EIG kuna kara yimaliwa eyi vana kugwana rumwe tupu yokusika ko N$750 eyi vana tulisapo epangero, vana kupa vantu ava vana kara asi kwazumbanesa yiwizamo yawo ndi asi awo kuna kunyanda morwa epato sirongo mokulikunga kouvera ou woCorona una gumu uzuni naunye. Shikwambi katente asi kansela kuna mutamba erapoto lyokuninkiliramo rutu rwamukwawo kumwe nokumulika uta eyi yakara asi kwayisilika kulika muntu uta, yimo ana kugwedako ngoso; Eyi kuna kara asi eninkiliromo kuhamena kovakadi kwati nampili gumwe ogu ana kuyikwatesako moNamibia, unene konkarapamwe ndi asi kovampitisili dopaupolitika. Shikwambi simpe katente asi Kandji kuna mutamba ezonaguro yiweka yamukwawo nokumutuka negano asi age kakere negano lyokuzonagura rutu rwamukwawo, konyima age hena katukagwire mugara gatunga hena moKatutura kumwe nokuzonagura ehauto lyendi. Mugara ogu kapatwilire simpagwa esi mo 19 mwaKudumogona 2020, nye kansela kapi kavamukwete posiruwo oso, yimo ana kuhuyunga komisare gona. Kandji kuna kara ngesi silyo saSWAPO mondango zanavenye age kwakara asi pwanare ngorooro adukagana noveta. Ekonokono lyovaporosi kunwa kutwima.