ONGWEDIVA - Ombelewa yoshikandjohoololo shaKongo oya yambidida ovanafikola 500 ve li momhumbwe yoikwafifohongo.
Omaandaxa kansela Efraim Shipindo okwa yandja oikwafifohongo ngaashi omambo, eepena nomidjalofikola keefiola mbali domoshikandjohoololo shaye.
Eefikola da pewa oikwafihongo Okongo Project School nofikola Olukeno Primary School. Kansela woshikandjohoololo shaKongo Efraim Shipindo okwa ti elalakano loprongalama ei okuyambidida ovanafikola ve li momhumbwe yoikwafifohongo. Okwa didilikwa oshikandjohoololo shaKongo ku na ovanafikola hava di komikunda domakule tava mono oixuna unene tuu onghalo yokuhe na oikwafifohongo noututa wokukwafele ovanafikola voukadona ngeenge ve li komafimbo opaushitwe. Shipindo okwa ti ombelewa yaye oya didilika ounona vahapu momikunda da yooloka va pumbwa oikwafifohongo.
Onghee okwa ti naashi osha eta opo a kale a totapo oshikefa shokuongela oshimaliwa ile okukonga omakwafo oikwafifhongo komahangano a yooloka. “Otwa tameka nale okuyandja oikwafifohonga kovanafikola keefikola da yooloka ngaashi omambo okushanga, eepena noshoyo omidjalofikola. Onghee ohatu lalakanene kutya ka pena omunafikola moshikandjohoololo shaKongo ta kala e li motundi ehe na omambo okushanga,” ta ti.
Shipindo okwa ti itashi ulike efano liwa ngeenge omunafikola e li mokati kavakwao ndele ke na omambo okushanga ile ehe na omidjalofikola molwashi omunafikola ita kala a manguluka.
“Ovanafikola ovo ovaleli vokomongula, ovanafikola otava ka ninga ovanashilonga va yooloka noku eta po eemhito doilonga. Onghee osha fimana ngeenge ohatu yambidida ovanafikola noikwafifohongo opo ve li honge noupu,” Shipindo ta ti. Okwa weda ta ti ngeenge omunafikola a longwa otashi mu kwafele okukakonga oilonga nokonima ota yambidida ovafamili yaye nelalakano lokulwifa ondjala noluhepo. “Omudali ngeenge okwa taalela omashongo okuyambidida okaana kaye noikwafifohongo na kwatafane nombelewa yetu opo tu kale twa ninga omalongekido ngheene okaana kaye ke na okukwafelwa,” ta ti. Okwa weda po ta ti eprongalama ei otai ka yambidida yoo vali okulandela ovanafikola voukadona oututa wokuvakwafela ngeenge ve li komafimbo opaushitwe.
“Otwa didilika ovanafikola voukadona va ninga oihakanwa yokufaula keetundi ngeenge ve li komafimbo molwashi vehe na oututa. Onghee ohatu twikile okuyambida ovanafikola noututa,” ta ti. Okwa indila omahangano a yooloka novanangeshefa opo va yambidide oprongalama ei noshimaliwa ile okulanda oututa noikwafifohongo.
- fhamalwa@nepc.com.na