ONGWEDIVA - Omupeduminista mouministeli woikwameni neameno lokeengamba Daniel Kashikola okwa kumaida ovanafikola opo ve likaleke kokule noikolwifa noingangamwifi molwaashi otai eta edopo kexulilo lomudo.

Kashikola okwa twa ovanafikola omukumo ve lihonge nondjungu nokulitula mo moinyangadalwa yavo yofikola.

Edi Kashikola okwe di popya pefimbo a ninga omutumba novanafikola, ovahongifikola, ovaleli vopapolitika novadali kosekundofikola Oshela Secondary Schoolo Omaandaxa.

Elalakano lomutumba ola li okukundafana nghee ovanafikola ve na okuyambididwa opo va dule okupita noitwa iwa kexulilo lomudo.

Komutumba okwa kundafanwa oinima ngaashi elongifo nai loingangamwifi nomalodu, ovanafikola tava i moixulo, ovanafikola voukadona tava ningi omateelelo,  Kashikola okwa kumaida ovanafikola opo va kale kokule noinima ei tai dulu okueta edopo unene tuu ovanafikola ve li meendodo dopombada.

“Ovanafikola otava ka ninga oveleli novanashilonga va yooloka komongula, onghee osha fimana opo ve lihonge nelitulemo nokukala va pita nawa opo va dule okuya koipupudilo yopombada,” ta ti. Kashikola okwa twa yoo vali ovahongifikola omukumo opo va kale tava longo nondjungu noshoyo okuyambidida ovanafikola ve na oupyakadi moilongwa yavo.

“Ovadali navo nava kale tava kufa ombinga okupopya nomaludalo avo komaumbo opo va kale va fimaneka ovahongifikola molwaashi okwa didilikwa ovanafikola vamwe va dina ovahongifikola vavo,” ta ti. 

Okwa weda po ta ti ota twikile okukala a ninga omitumba yoo vali keefikola dimwe da yooloka moshilongo opo va kundafane kombinga yedopo movanafikola.

fhamalwa@nepc.com.na