• October 17th, 2019

Kashima a pandula Nampongo sho a elula nekulyu lye konima yoomvula 18


OKADHILA- Nonado aalumentu oyendji moshilongo mboka haya iyadha moondjokana naakiintu yawo ya hakukilwa komikithi omidhigu ee taya lemana ohaye ya shuna ko kooyina, omugandjimayele gwangoloneya gwoshitopolwa shaMusati ngoka woo e li omusita mongerki yEvaangeli paLuther tate Philipus Kashima okwa kala nokushunga omwenyo omuholike gwe oomvula 18 sho a hakukilwa komukithi omudhigu ngoka gwe mu lemaneke,  na ina shuna monima.

Ndhika Kashima okwe dhi popi oshiwike sha zi ko  sho a tyapula onkalamwenyo yawo nomukulukadhi gwe mondjokana oomvula 40 noshowo okupandula Kalunga ke sho a kala omunankondo pethimbo ndyoka omuholike gwe a kala e li muuwehame.

Kashima ngoka a longitha ompito ndjoka okuhokolola unene omashongo ngoka ya kala ya taalela nomukulukadhi gwe oomvula omilongo 45 oya tyapula oshituthi shoka pegumbo lyawo pOkadhila mOndukuta mUukwaluudhi moshikandjohogololo shaTsandi moshitopolwa shaMusati.

Omugandjimayele okwa hokolola kutya yo nomukulukadhi gwe Elizabeth Mwetulamba Kashima oya li ya  hokana momumvo 1979 moka ya kala ye na euvathano nelongelokumwe mohole yawo nomondjokana yawo.

“Ondjokana yetu oya li ya pamekwa kohole, euvathano nelongelokumwe noshowo enyanyu lya kehe esiku,” osho Kashima a hokolola ngaaka omanga a li ta popitha engathithi ndyoka lya li lya gongala opo lyi gandje omukumo nehambelelo kumbaka yaali.

Ashike shoka tashi enditha omwenyo mehokololo lyaambaka yaali oondyoka kutya Kashima okwa hokolola kutya eityo lyomukulu gwonale ndyoka tali ti kutya “Uuwanawa ihau kalele” shoka osho sha holoka kumbaka yaali sho Elizabeth a hakukilwa kuuvu  mboka a lumbu nawo oomvula 18.

“Okukala kwetu megumbo lyetu otwa kala nelongelokumwe oomvula adhishe dho. Ashike uuyuni ihau kalwa nawa thiluthilu naashoka oshi li shoka oshitopolwa shonkalamwenyo.  MuDesemba gwomumvo 2001 omukulukadhi gwandje  okwa kwatwa komukithi omudhigu  gwombinzi ya londa  ndele tayi mu lemaneke,” Osho Kashima a hokolola ngaaka.

Okwa tsikile ko ta ti kutya okuza esiku ndyoka omuholike gwe a hakukilwa komukithi ngoka,  naye wo okwa kwata ashike kombinzi ya londa  nokwa kala ashike naye a fa ta ehama. 

“Otandi pandula kalunga kandje oshoka omukithi nguka ogwa kutha ko aantu oyendji kombanda yevi , sho osho nee twe mu ithanena tu ye tu panduleni pamwe, otatu pandula Kalunga sho twa kala mondjokana yetu oomvula 40,” osho a hokolola ngaaka.

Nonando omukulukadhi gwe oku na omwenyo sigo onena onkene ngaa a lemanekwa kuuvu mboka, ke na wee naanaa shoka ha longo oshoka okwaako kwe kokolumoho ihaku kwata sha .
Kashima okwa hokolola omukulukadhi gwe onga omukiintu ngoka e na omukumo, ta ti nonando ta alukwa ngaaka omuntu gumwe e hole Kalunga iha faula ongerki nonando oku li omunkundi lela.

 Ashike shoka tashi hokitha mumbaka yaali notashi etitha omukumo monkalamweno ooshoka kutya,  sho aniwa Elizabeth a lemana mbaka yaali kaya li ye na omunona gwawo nande ogumwe ta longo .
Oya pewa omagano gaanona yahamano mondjokana yawo aakadhona yatatu naamati yatatu.

“Onda kambadhala nuuvu nokulongitha aanona yetu sigo ayehe twe ya pititha noshowo omutekulu gwetu gumwe ngoka twa tota naye egumbo lyetu. Otwe ya pititha nuudhigu  kombinga ndjika yosikola,” Osho omugandjimayele omuuvithi a hokolola ngaaka.

Omuuvithi nguka okwa hokolola kutya okwa kala ta longo nuudhigu, ashike okwa pandula Kalunga sho a kala omukwathi gwe pethimbo ndyoka lya li edhigu.

Sho a kala ta longo nuudhigu pethimbo ndyoka aanona ye ayehe mboka a kala nokufutila osikola kapu na ngoka a epitha oonkondo dhaakuluntu yawo onkene ayehe ngashingeyi aantu ye na oshilonga mepangelo lyaNamibia. 

Kashima ngashingeyi oku na , aalongisikola yaali, aakwiita metanga lyegameno yaali. Kakele kaambaka oku na wo omupolisi , omanga gumwe ta longo onga omunambelewa gwoonzo dhaantu muuministeli wegameno .

Kashima onkene ta ti kutya shika oshe mu pe omukumo opo nduno a ithane oshigongityapulo shoka a pandula Nampongo gwe.

Aapopi oyendji mboka ya popi moshituthi shoka oya kala nokutangumuna Kashima onga gumwe gwoomaanankondo moshilongo ngoka a kala e li muudhigu mboka sigo te wu pondola ina shuna monima.
 


Loide Jason
2019-07-22 11:35:12 2 months ago

Be the first to post a comment...

You might also like...