Mubihi wa Mutende

Katima Mulilo – Balipisinisinyana mwa sikiliti sa Zambezi banyazize katengo ka sikiliti sa Zambezi sihulu mutayi wa tuto kuli bafa lipeleko kamafosisa. Taba yeo itaha kasamulaho yomuñwi wa babaipeleka yana nipisinisi yakufa lico, yana salati kubulelwa libizo naluzize peleko yakuyofa lico kwamukopano mwa silalanda sa Katima. Naize nihana lukisize mampampili kaufela nikuli natomile masheleñi amanyinyani peleko nefilwe kuyomuñwi yanatomile mali amañata. Naekelize kuli ye kitaba yesweli kuezahala nako kaufela mi lipisinisi zeñwi zashemubiwa kufita zeñwi. Ba New Era nebalemuhile kuli yomuñwi wa bababilaela yana timilwe peleko yakuyakuisa lico kwababatu babalikana 146, kamasheleñi alikana N$12,000 kwamukopano mwa Katima Mulilo, mi nafilwe peleko yeñwi mwa silalanda sa Ngoma yamasheleñi alikana N$5,000, kono naihanile.

Nañozi liñolo lene libonwi  kiba New Era lene liya kwa katengo kakafa lipeleko. “Nilatelanga mampampili aka kwa lipeleko kaufela kono nifiwanga feela yamali amanyinyani, babañwi bakona kufiwa peleko yaviki mukatumbi kapa yamazazi, kono na hanisikafumana kale peleko yefitelela mazazi amabeli, kiñi hakuli cwalo? Nihakubonahala kuli nitomanga  mali akutezi fafasi,” nekubaleha liñolo. Nabilaezi hape kuli babiziwanga kakulyeha kwakuyofitisa manzwi abona, ili taba yebabeela kwatuko. “Balulemusanga kakulyeha, balubulelelanga sekusiyezi feela zazi liliñwi. Habalufi nako yakuitukiseza,” nabulezi. Hana buzizwe kuli kiñi hana hanile peleko yana filwe, naize kabe nailumezi hakuna sana kafumana fateñi. “Neni kafumanañi kabe nenilumezi? Hakuna, kakuli masheleñi kaufela nakasinyehela feela famusebezi one nikayo eza mi nenikazwa fateñi mazohozoho,” natolokile. 

Hana kupilwe ku alabela falitaba zeo, sibuabui wakatengo kasikiliti Damian Siyambango nalatuzi likakalezo kaufela. Natolokile kuli lipeleko lifiwanga kakulatelela buka yakamaiso yalipeleko. “Hakuna lipeleko zefiwa kamafosisa. Lipeleko lifiwanga kuyalifisa masheleñi amanyinyani,” nekubulezi Siyambango. 
Naekelize kuli batu basike kumatelanga kubamitende, kono baswanezi kuya kwa ofesi yahae kuyobuza haiba bapalezwi kufumana peleko. 

“Ofesi yaka ikwaluhile kufa lituso, ikona kuba kuli mutu yo nasikafa mampampili kaufela ane atokwahala kikafo nasikafiwa peleko nihaiba kuli nalifisa mali akutezi fafasi,” natolokile.