New Era Newspaper

New Era Epaper
Icon Collap
...
Home / Kawana ota talele po oitaasi yopolifi yokonooli

Kawana ota talele po oitaasi yopolifi yokonooli

2021-08-27  Festus Hamalwa

Kawana ota talele po oitaasi yopolifi yokonooli

Festus Hamalwa 

Minista woikwameni neameno lokeengamba Dr Albert Kawana oku li metalelopo loitaasi yopolifi moitukulwa ya yooloka monooli. Oitaasi oyo tai talelwa po, oyomoshikandjohoololo shaKongo, moshitukulwa shaHangwena, unene oyo i li keengamba daNamibia naAngola.

Minista ta ti elalakano letalelepo laye okudidilika omashongo a taalelwa kopolifi konooli nokutala nghee ovapolifi tava longo.

Kawana okwa ti eshi osho oshikando shotete ta talele po oitaasi yopolifi yokeengamba moshikandjohoololo shaKongo, okudja eshi a ninga ominista yeameno, onghee okwa hala oministeli yaye opo i kale ya didilika omashongo a taalelwa kovapolifi keengamba, oshoyo nonghene omukundu ou tau kandulwa po.

Osheendo osha kwatelwa komesho komukulunhu wopolifi moNamibia Inspector Lieutenant General Sebastian Ndeitunga, omukulunhuwiliki mouministeli woikwameni neameno lokeengamba Etienne Maritz opo va topolafane omayele ngheene oitaasi yopolifi i na okupewa omayakulo a wana.

Okwa ti oministeli yaye oya didilika eemhumbwe adishe edi da pumbiwa koitaasi yokeengamba, yee ta ti oministeli otai ka longa nelitulemo opo i kwashipaleke kutya oitaasi yopolifi oya pewa omatungo opashinanena noilongifo ya wana okulongifwa kovapolifi opo va shiive okulonga noupu.

Kawana okwa ti okwa pandula opolifi eshi tai longo nelitulemo opo i kwashipaleke kutya oshiwana oshi li meameno la wana.

Kawana okwa twa ovapolifi omukumo opo va twikile nokulonga nondjungu nelitulemo, yee ta ti ovapolifi nava kale tava longo pauyuuki.

ν


2021-08-27  Festus Hamalwa

Share on social media