Minista woikwameni neameno lokeengamba Albert Kawana okwa ti ovanambelewa vopolifi ove li ninga ookalyamupombo shaashi paife navo ohava oimbuluma.
Kawana okwa kumaida ovapolifi opo va xulife po okulonga oimbuluma molwashi itashi ulike efano liwa moshiwana.
Moimbuluma oyo yatofwa kuminista omwa kwatelwa ofuto yeembumbo oyo Kamwana a ti ete kei li didimikila.
Edi minista Kawana okwe di popya Etitatu pefimbo kwa li ta patulula oshitaashi shopolifi molukanda Tutaleni moWalvis Bay.
Okwa ti ovapolifi nava kale tava ulike oshihopaenenwa shiwana moshiwana, vo nava kwashipaleka kutya otava longo pauyuuki.
“Oshinakuwanifa shomupolifi okukeleka po eameno loshiwana. Ovapolifi ovanhu ve linekelelwa koshiwana onghee osha fimana opo va kale ve na ekwatafano liwa noshiwana,” Kawana ta ti.
Kawana okwa weda po kuty ovapolifi nava fimaneke oilonga yavo noshoyo oku li fimaneka voo vene unene tuu ngeenge ve li momudjalo woilonga.
“Ovapolifi nava twikile okuyandja omayakulo mawa koshiwana ngeenge tashi ka konga omakwafo koitaashi yopolifi. Ovanhu aveshe nava yakulwe shifike pamwe pehe na omunhu ta ningwa oka tonga molwashi oitaashi yopolifi oyo shiwana,” Kawana ta ti.
Okwa kumaida oshiwana opo shi longelo kumwe nopolifi mokukondjifa oimbuluma tai ningwa momidingonoko davo.