Khuta Yepahami ikabe ibile mwalikiliti za Kavango ya Upa ni Zambezi kukala la 1 kuisa la 31 Muyana 2023. Mubakweli kumuzamaisi mwalitaba zasicaba mwaofesi ya mulao, Vikitoria Hango, mwasitatimende sene sifilwe kwababihi bamakande viki yefelile, naize Khuta Yepahami ika ina kakulatelela Mulao wabu 16 wasilimo sa 1990. Naize Khuta Yepahami ina ni likhuta zepeli ze inelezi mwa Windoko ni mwa Oshakati.

“Mueteleli waba Atuli habona kuli kuna nitokwahalo kuli lisebelezo zamulao lipetwe ukona kulumelela kuli lisebelezo za Khuta Yepahami liezahale mwalibaka zeñwi zanaha Namibia,”nekutolokile Hango. Kakulatelela kalulo yeo, mueteleli waba atuli, kakusebelisana ni babañwi, nalemuhile butokwa bwakuba ni lisebelezo zakhuta mwalikiliti zebulezwi mwakubata kutahisa likatulo zetokwahala. Yeo nebonwi kakuba nzila yakubata kufukuza kwamukoloko walitaba zabubangoki mwalikiliti zeo.

Kacwalo mueteleli waba atuli, uka inela mizeko mwasikiliti sa Kavango ya Upa kukala la 1 kuisa la 15 Muyana 2023. Ukaliba kwasikiliti sa Zambezi, nikuyo inela mizeko kukala la 15 kuisa la 31 Muyana 2023. Mueteleli waba atuli uitekezwi kuyo zamaisa mizeko yabubangoki yelobapeli mwalikiliti zepeli. “Babanyazwa ni lipaki zabona mwamizeko yelobañwi kaufela bazwelela mwa Rundu ni Katima Mulilo. Likhuta zalikiliti zeo liketilwe kuli liyo inela litaba zeo za Khuta Yepahami mwanako yeo,” nekubulezi Hango. -Nampa