2006-03-17Staff Report 2 Moomu gana kusesupa mema goruhanzo moMariental nonomutangu doku lirundira yimo dina kuwiza movantu.Nonyara nokulika vantu nonomurungu yiyo kayitamekere konyima tupu apa rwava myaukilire ruhanzo omu rwatjilisire asi nampo taru zonagura utokero wodoropa ozo. Vantu ngesi vana hara vaturepo mbunga zekona-kono vatarurure asi ngapi nava paruka noNdama ezi zomo Hardap.ezi vana kugazarera asi yizo zaretapo udigu ou.Nagumwesi ana kuhara kutambura sinka esi asi simutambe. Ezonaguro nalyosi kapi vana ligwana nawa - nawa asi mulyo gwayingapi gwazonauka vadivi vayo kuna kutanta asi kuvhura kusika konomiliyuna N$5O. Vamwe vatungimo novanangesefa kuna kupa umbondo Namwater omu gapilire kusikisamo sirugana sendi asesupike epito lyomema nye yisesu hambara varuganeko.Ame nina zumbanesa yininke yoyinzi yimo ana kutanta Johan de Lange, mwenya Spar notela, nonokomputa vahepa kurandako dimwe. Nonsako nadinye odo ono kumona opo doroso nanagwasa twahwpa kudizuguma. Ame kapi nina kupa Namwater umbondo nagesi kwato eyi navhura kurugana. Mvhura ezi zarokere zonene zatu pere marondoro posiruwo sina gwanene. Awo vahepa kupaturura nomuvero domema yipo mema gapite. Sihorokwa esi sidona unene,nye yinke natu vhura kurugana. De Lange kasinganyekere asi age kuna zumbanesa konyara nomiliyuna N$5 nonomiliyuna N$6 ngoso. Ekuma vahepa kulipayinda.Yitiars vahepa kuturamo yoyipe. Nomahina doku ninkisa nomboroto nado vahepa kudi gusamo vaturemo dono pe.Eyi nayinye yahepa kugusa konyara makwedi ntazimwe asi ngesefa zikaze mouta wakora. Apa nye Presidente Hifikepunye Pohamba kakadingwire doropa zina moutatu,age kayi kamu tetwire yipo kakatumbwidilire asi epangero lyendi nalirugana ko yuma vavatere ava runagumu ruhanzo oru. Namwater simpe kuna kutantera muhoko asi age kapisi yimuyuke yoruhanzo oru,simpe kagwedereko asi ngano kayi zonaukire unene nsene asi ngano kapi kava zegwilire nompito odo mosikondovike. Vantu vamwe kapi kayi vahafesere moku vatantera asi mwahatuhandukira handukireni mvhura. Awo ngesi vana hara vaturepo mbunga zekona-kono kapsi yilye navaditaparara nye asi ngano ngapi nava popera asi yahahoroka hena yoku fana ngesi. Twahara tudive asi yilye mwene ogo garere age moyirugana? yimo ana kupura munangesefa gumwe age ana handuka. Owo ngava kona-kona vahepa kugava egano asi ngano ngapi natu vhura kuka-ndana ruhanzo oru rwahakahoroka hena.Yatu horkerere yangesi mo 2000. Ano ngesi yina horoka hena mo 2006.Tuyitarere nye ngorooro ngesi? Kwato nongendeseso edi nadi twaredera tugusepo simpagwa sangesi? Ngomu hoko twahepa kuturapo nonkambadaro tutunde moupyakadi wangesi. Ose kapi natu kara nkenye apa asi wokuhanzera. Ngapi natu kulika evango lyetu paekonomi nsene ose nkenye apa kuhanzera? Ngano asi ruhanzo oru ro mvhura mwazene awe nkenye ogu kuvhura oyi zuvhe. 2006-03-17Staff Report 2
