Omupedupresidente Nangolo Mbumba okwa yambidida ovakainhu ve lihumbata, va teelela kewalandamoshipangeloshaNandjokwekonima eshi e va landela omatalashe nomakumbafa. 

Ovakainhu ova pewa omatalashe 20 nomakumbafa 34, noinima aishe kumwe oi li pongushu N$32 000. 

Okwa didilikwa ovakainhu ve liumbata hava di kewalanda kOnandjokwe ova ninga oihakanwa yokudengwa koutalala omanga vamwe ova kwatwa keshikisha nokoshidu shamalaria. 

Ovakainhu ve na omateelelo ohava nangala pedu meni lewalanda va yala po omapakete omanga vamwe ohava nangala keembete kuhe na omatalashe. 

Moshipopiwa shaye sha leshwa kukansela woshikandjohoololo Ondangwa Leonard Negonga, Mbumba okwa ti okwa landela ovakainhu omatalashe nomakumbafa konima eshi a lesha ehokololo moshifokundaneki New Era, kombinga yovakainhu tava mono oixuna. 

“Ehokololo ola etela nge olukeno. Kashi li mondjila omukainhu e lihumbata ndele ota nangala pedu ta dengwa koutalala. Onghee onde va landela omakumbafa opo vaha dengwe vali koutalala,” Mbumba ta ti. 

Mbumba okwa yelifa ta ti okwa longifa oshimaliwa sha dja mondjato yaye mwene molwaashi ota lalakanene okuyambidida oshiwana shi li moluhepo. 

Moshipopiwa shaye omukulunhuwiliki ta kwafele koshipangelo shaNandjokwe, Dr Talisha Shivolo okwa pandula omupedupresidente eshi a yambidida ovakainhu ve li kewalanda. 

Okwa ti omalatashe nomakumbafa okwe uya pefimbo liwa onghee otaa ka kwafela ovakainhu vaha ninge oihakanwa okudengwa koutalala. 

Elizabeth Saulu e na eteelelo leemwedi omuwoi, okwa pandula eshi a pewa ekumbafa laye. 

“Paife itandi ka dengwa vali koutalala molwaashi a nda pewa ekumbafa lange la kola,” ta ti. fhamalwa@nepc.com.na