Mubihi wa Mutende

Kampani ya Mbyumbyulu ya Namibia nezibahalize kuli lifulai zayona kaufela liyemisizwe, kungelela hamoho nizamwahala naha kuzwa la 27 Liatamani kuisa la 20 Lungu. Lifulai zeya kwanda naha nizona neli yemisizwe kuzwa la 14 Liatamani, mi lizibiso zeñwi lika latelela. Zeo kaufela litaha kulatelela taelo ya Mueteleli Hage Geingob, hala kubata kufukuza kuambalakana kwa kakokwani ka Corona. “Mwalikalulo zeñwi za butokwa Mbyumbyulu ya Namibia itukiselize kufa nzila ya mbyumbyulu hala lituso zabuntu, hamoho cwalo nikutusa mwakulonga milyani yabutokwa, hala zeñwi,” nekubaleha piho. Mbyumbyulu ya Namibia hape itahisize zwelopili kubababata kucinca mazazi abona akuba mwalieto. Litupa kaufela zelekilwe kuli mube mwalieto kuisa la 30 Lungu, lika konwa kucincwa hamwi kuisa la 31 Ñulule 2020. Baleki bakona kucinca mazazi alieto falikete kapa kakulumela liñusa ka imele. “Mbyumbyulu ya Namibia iswalisana ni lifasi mwakulwanisa kuambalakana kwa kakokwani ka Corona. Silelezo ya batu belulonga, babeleki ni naha kabupala isiala kuba yabutokwa hahulu kuluna,” nekufelelelize piho.