Ovapolifi ve na eenngatu dopedu hava longele mOmuthiya vati otava fukwa okudja momaumbo oilonga nounona vavo shaashi vati ove na eengatu di li pedu moilonga.

Ova hokolola tava ti ova pewa elombwelo kukomufala wopolifi mOshikoto Teopoline Kalompo-Nashikaku kutya momaumbo opolifi omwa pitikwa ashike okudja ovapolifi nounona vavo ve na eenghatu okutameka puInspekta fiyo opombada.

Omukanda wa shangelwa ovopolifi kuNashikaku momafiku 14 omwedi ou, okwa shanga mo ta ti ovapolifi ve na ounona nava kale va dja mo momalukalwa opolifi omanga omafiku 18 Auguste inaa pita.

Onghee okwa shanga mo ta ti omalukalwa oo otaa ka ningilwa omakonakono opo ku talike ngeenge omu na ovapolifi ve na ounona.

Ovapolifi ova lombwela Kundana tava ti ovapolifi ve na eenghatu ngaashi Constable, Sergeant noWarrant inava pitikwa okudja momaumbo oilonga ve na ounona vavo ashike omupolifi ngeenge ke na  okaana okwa pitikwa okudja meumbo omo.

Ovapolifi otava ti paife ova lulilwa konghalo shaashi kave shi kutya otava ka dja peni nounona vavo.

Onghee ova pula kakukutu wopolifi Inspector General Joseph Shikongo opo a kale a ya mo eenyala moshikumungu eshi.

“Fyee otu na nale oyuuyemo i li pedu ashike paife ohatu lombwelwa tu dje mo momaumbo oilonga nounona vetu,” omupolifi ta nyenyeta.

Omunambelewa umwe wopolifi okwa nyenyeta ta ti kashi li pauyuuki eshi tava ngabekwa okudja momaumbo oilonga nounona wavo omanga ovapolifi vamwe tava pitikwa.

“Ovanhu vamwe otu na ounona vashona onghee itatu dulu oku va fiya komaumbo. Ounona vetu ova pumbwa etonatelo la wana onghee naashi osha eta opo tu e ounona vetu keenhele doilonga,” omupolifi ta ti.

Omupolifi mukwao okwa nyenyeta ta ti ovanhu aveshe nava talike ko ashike ve fike pamwe molwaashi omaumbo ovapolifi okwa nuninwa ovanambelewa aveshe vopolifi.

“Atushe ohatu longo oilonga ya faafana, omukulunhu wetu wopolifi mOshikoto ita longo pauyuuki shaashi ota ningile ovapolifi ve na eeghaty dopedu okatongotongo,” ta ti.

Eshi a kwatafana naKundana omukulunhu wopolifi mOshikoto, Commissioner Teopoline Kalompo-Nashikaku okwa ti ombelewa yaye oya didilika omanyenyeto ovapolifi kombinga yoshikumungu eshi.

Onghee okwa ti okwa shangela yoo vali omukanda kombelewa yakakukutu wopolifi Inspector General Shikongo opo a dule okukandula po omukundu ou wovapolifi tava nyenyeta.

 Nashikaku okwa ti ombelewa yaye oya didilika ounona voukadona noumati hava kala tava topolelafana oulikoshelo novakulunhu ngeenge tave ke likosha.

“Osha puka okaana kokamati ile okakadona taka pingafana nomukulunhu ka uka kokalikoshelo,” ta ti.

Nashikaku okwa ti elombwelo eli ola pewa ashike ovapolifi hava di momihandjo dopolifi di li moluumbo omu mu na eembelewa dakula dopolifi mOmuthiya.

Lopokati opo, Nashikaku okwe likala ta ti yee ina yandja elombwelo kovapolifi va dje mo momihandjo.

Okwa weda po ta ti momihandjo ihamu di ovapolifi ve na eenghatu douinspekta ashike ohamu di ovapolifi ve na eenghatu okudja puwarrant okuya pedu.

“Omihandjo oda tulwa eemhango di na okulandulwa onghee ovapolifi nave liufe ashike komilandu da tulwa po,” ta ti. 

– fhamalwa@nepc.com.na