ONGWEDIVA- Vahapu otava hokolola Emmanuel Muatara onga a li omulumenhu a eshi nawa nokwa fimaneka eenghulunghedi nomifyuululwakalo dOshiwambo odo kwali ha hokolola oku pitila moyiimbo nomeengano.
Muatara okwa xulifa momafiku 17 omwedi ou moWindhoek mepipi lomido 90.
Okwa kala a shivika nawa okupitila moimbo yOshiwambo, moitevo nomamhokololo oo kwa li ha yandje keeradio yoNBC Kati FM nokoEagle fm.
Monakudiwa yaye Muatara omuhongifikola keifano, omushangi womambo noshoyo nomukondjeli manguluko, a kala oshilyo shongudu yoSwapo, omo a kala noku xwaxwameka oshiwana.
Omukulunhuwiliki mukulu moRadio yoNBC yOshiwambo nale, Helena Shiimbi okwa hokolola ta ti Muatara okwa dana onghandangala ya kula okuyambula po eepolongala dounona moRadio.
“Oshiwana okwa li shi hole okulandula eepolongalama daye ngaashi oimbo noitevo molwashi okwa li tai tungu nokuhafifa,” ta ti.
Shiimbi okwa ti Muatara okwa xwaxwameka omifyuululwakalo moshilongo noku yandja ehongo koshiwana kombinga yefimano lado.
“Muatara okwa li omulumenhu omunambili noku na elandulafano. Omulumenhu e hole okulonga oilonga yaye pefimbo,” ta ti.
Tatekulu Vilho Tshilongo, omupekapeki, nomunyoli weendjokonona, oo naye e na eshivo ngaashi naanaa laMwatara, yee oku li omukondjeli manguluko nokwa li kaume kaMuatara okwa hokolola ta ti Muatara okwa li ehole okupukulula ovanhu.
“Otwa longela kumwe naMuatara efimbo lile, twa kala hatu shange omambo mOshiwambo nokuninga oimbo noitevo. Onda ka nifa kaume muwa, omuyandji mayelele kukeshe umwe,” Tshilongo ta ti.
Tshilongo okwa ti alushe ngeenge ta nyengwa komishangwa okwa kala ha pukululwa kuMuatara molwashi okwa li e na owino melaka meendjokona.
“Muatara okwa li ehole okufatulula omayetumbulo wOshiwambo molwashi ka kwa li ehole okupopya oshiima shihe uditike,” a weda po.
Kannedy Muatara ye okwa tanga xe onga omulumenhu kwa li e na outeku muwa, a tekula nokulonga ounona vaye va efimano lomufyuululwakalo noshoyo etilokalunga.
“Tate okwa li ehole elandulafano. Okwe tu tekulila tu fimaneke ovakulunhu aveshe noshoyo okukala tu holafane,” ta ti.
Oma longekido epako laMuatara oku li metifi onghee oshiwana otashi ka shivifilwa kutya ota ka pakwa naini.
– fhamalwa@nepc.com.na