Mubeleki mwalikolo la zanaheñi ni bupoti natamilwe nibabañwi babalalu kakuzuma folofolo yesilelelizwe, ili kokoñu yandilu mwasibaka sapabalelo yalifolofolo sa Daan Vilijoen, upa watolopo ya Windoko. Nebatamilwe Labubeli, famuseco wiko wa Windoko kulibana ni sibaka sa pabalelo yalifolofolo. Mubeleki yana tinile liapalo zamusebezi natamilwe, nibanyazwa kabona, bamano fumanwa balongile kokoñi kokulongiwa libyana mwamotikala yamufuta wasedan.

Mubeleki ubihiwa kuli usebeleza kwasibaka sapabalelo yalifolofolo, teñi kimutusi kumubabaleli walifolofolo. Hape kukulubelwa kuli yomuñwi wababanyazwa upepwa ni mubeleki wakwasibaka sapabalelo yalifolofolo, mi yomuñwi kisizumi isi kamulao yazibahala hahulu, mi yomuñwi ubeleka mwapanka mwa Windoko. Sibuabui walikolo la zanaheñi ni bupoti Romeo Muyunda nanitifalize kezahalo yeo, mi naize likolo libilaezwa kitaba yakuli mubeleki natamilwe nibaba`nwi babalalu. 

“Musebezituna waluna kakuba likolo, kikubona kuli lusileleza lifolofolo zanaheñi, kuzamaisa sebeliso yazona nikubona kuli masika akwapili atolifumana mi kezo yeo yacwale iloba milao yeo,” nekubulezi Muyunda. Muyunda nabulezi hape kuli babeleki balikolo babapala kalulotuna mwakubona kuli likolo lipeta musebezi walona. Kacwalo naize, babeleki kamita basusuezwa kuba ni buiswalo, niku ambuka miliko yakuitenga mwalikezo zeloba mulao. “Lususueza kuli mulao mi katulo sakata ibe teñi mwataba ye,” nabulezi.